കൊച്ചി: കൊവിഡ് കാലത്ത് മതത്തിനുമപ്പുറം മനുഷ്യസ്നേഹത്തിന്റെ മാതൃക കാട്ടുകയാണ് ഉദയനഗർ കോൺവെന്റിലെ കന്യാസ്ത്രീകൾക്കൊപ്പം ഉദയനഗർ കോളനിയിലെ യുവാക്കളും. ഇത്രനാളും നൽകി വന്നിരുന്ന പലവ്യഞ്ജന,പച്ചക്കറി കിറ്റുകൾക്ക് പുറമെ റംസാൻ വ്രതം ആരംഭിച്ചതോടെ ആവശ്യമുള്ള കുടുംബങ്ങൾക്ക് ഭക്ഷണ കിറ്റുകളും നൽകുകയാണ് ഇവർ. ലോക്ക് ഡൗൺ പ്രതിസന്ധി മാറുന്നത് വരെ അർഹരായവർക്ക് ഭക്ഷണമെത്തിക്കുവാൻ ഒരു ഫോൺകാളിനപ്പുറം കാത്തുനിൽക്കുകയാണ് ഇവരുടെ കൂട്ടായ്മ. ആവശ്യമുള്ളവർ 8281063290 , 9946640951 എന്നീ നമ്പറുകളിൽ വിളിച്ചാൽ മാത്രം മതി.

ഉദയനഗർ കോൺവെന്റിലെ മദർ സുപ്പീരിയർ സിസ്റ്റർ അനീഷ്യയുടെയും സിസ്റ്റർ അഞ്ജലിയുടെയും യുവജനസംഘടനാ പ്രവർത്തകൻ പി.ബി ഷൻഹയുടെയും നേതൃത്വത്തിൽ ലോക്ക് ഡൗൺ തുടങ്ങിയപ്പോൾ മുതൽ സിസ്റ്റർമാരും യുവാക്കളും അടങ്ങുന്ന സംഘം പി ആൻഡ് ടി കോളനി, ഉദയ കോളനി, കമ്മട്ടിപ്പാടം, കല്ലുങ്കൽ കോളനി, കെ.എസ്.ആർ.ടി.സി പരിസര പ്രദേശം, കതൃക്കടവ് കോളനി, പുല്ലേപ്പടി കോളനി, ആനാം തുരുത്ത് കോളനി, റെയിൽവേ പുറംപോക്ക്, വെച്ചൂച്ചിറ കോളനി, കോയിത്തറ കോളനി, സൂര്യ ലൈൻ കോളനി, റെയിൽവേ കോളനി, ജേർണലിസ്റ്റ് കോളനി എന്നിവിടങ്ങളിൽ പലവ്യഞ്ജനങ്ങളും പച്ചക്കറികളും അടങ്ങുന്ന കിറ്റുകൾ വിതരണം ചെയ്ത് വരികയാണ്. കൂടാതെ അത്യാവശ്യ മരുന്നുകളും ഇവർ ആവശ്യക്കാർക്ക് എത്തിക്കുന്നുണ്ട്.