മൂവാറ്റുപുഴ: കല്ലൂർക്കാട് ഗ്രാമപഞ്ചായത്തിലെ തഴുവാംകുന്ന് ട്രൈബൽ കോളനിയിൽ വൈദ്യുതിയെത്തി. സംസ്ഥാനസർക്കാർ നടപ്പിലാക്കി വരുന്ന ആശിക്കുന്ന ഭൂമി ആദിവാസികൾയ്ക്ക് എന്ന പദ്ധതിയിലൂടെയാണ് കല്ലൂർക്കാട് തഴവാംകുന്നിൽ ആദിവാസി വിഭാഗത്തിൽപെട്ട ആറ് കുടുംബങ്ങൾക്ക് ഒന്നരയേക്കർ സ്ഥലം ആറ് വർഷം മുമ്പ് സർക്കാർ കണ്ടെത്തി നൽകിയത്. ഒരു കുടുംബത്തിന് വീട് നിർമിക്കാൻ 10 സെന്റ് സ്ഥലവും കൃഷിയാവശ്യത്തിനായി 15 സെന്റ് സ്ഥലം അടക്കം ആറ് കുടുംബങ്ങൾക്ക് ഒന്നരയേക്കർ സ്ഥലവും വീടുമാണ് ആദിവാസി വിഭാഗത്തിനായി നൽകിയിരിക്കുന്നത്. കോളനിയിൽ മൂന്ന് വീടുകളുടെ നിർമ്മാണം പൂർത്തിയായി. മൂന്ന് വീടുകളുടെ നിർമ്മാണം പൂർത്തിയാകാനുണ്ട്. പദ്ധതിയുടെ ഉദ്ഘാടനം നിർമ്മാണം പൂർത്തിയായ പുത്തൻപുരയ്ക്കൽ ബിനോയിയുടെ വീടിന് വൈദ്യുതി കണക്ഷൻ നൽകി എൽദോ എബ്രഹാം എം.എൽ.എ നിർവഹിച്ചു. ബ്ലോക്ക് പഞ്ചായത്ത് പ്രസിഡന്റ് ലിസ്സി ജോളി, പഞ്ചായത്ത് പ്രസിഡന്റ് ഷീന സണ്ണി, കെ.കെ.ജയേഷ്, അസിസ്റ്റന്റ് എക്‌സിക്യുട്ടീവ് എൻജിനീയർ സന്തോഷ് എബ്രഹാം, സബ് എൻജിനീയർ ബിനോയി, ലൈൻമാൻമാരായ മധു, നസീർ എന്നിവർ പങ്കെടുത്തു.