മൂവാറ്റുപുഴ: സഹപാഠികൾക്കുള്ള തുണി മാസ്കുകൾ വീട്ടിലിരുന്ന് തയ്യാറാക്കി മാതൃകയാകുകയാണ് ഈസ്റ്റ് മാറാടി സർക്കാർ വൊക്കേഷണൽ ഹയർ സെക്കൻഡറി സ്കൂളിലെ നാഷണൽ സർവീസ് സ്കീം യൂണിറ്റിലെയും ജൂനിയർ റെഡ്ക്രോസ് യൂണിറ്റിലെയും വിദ്യാർത്ഥികൾ. മാസ്കുകൾക്കായി പൊതുവിദ്യാഭ്യാസ വകുപ്പ് ഡയറക്ടർ ജീവൻ ബാബു മുന്നോട്ട് വച്ച ചലഞ്ച് ഏറ്റെടുത്താണ് വിദ്യാർത്ഥികൾ മാസ്ക് നിർമ്മിക്കുന്നത്.നടക്കാനിരിക്കുന്ന എസ്.എൽ.സി, ഹയർ സെക്കൻഡറി , വൊക്കേഷണൽ ഹയർ സെക്കൻഡറി വിഭാഗത്തിൽ സ്വന്തം സ്കൂളിലെ പരീക്ഷയെഴുതുന്ന സഹപാഠികൾക്കും അദ്ധ്യാപകർക്കുമുള്ള മാസ്ക്കാണ് നിർമ്മിക്കുന്നത്. തുടർന്ന് സമീപ സ്കൂളുകളിലെ വിദ്യാർത്ഥികൾക്കും മാറാടി ഗ്രാമപഞ്ചായത്തിലെ വിവിധ സ്ഥാപനങ്ങളിലെ ജീവനക്കാർക്കുമുള്ള മാസ്കുകൾ കൂടി നിർമ്മിക്കണമെന്ന ലക്ഷത്തിലാണ് കുട്ടികൾ.

അദ്ധ്യാപകർ ഫോണിലൂടെ മാസ്ക് നിർമ്മാണത്തിനുള്ള രീതികളും മറ്റു നിർദ്ദേശങ്ങളും നൽകും. കേരള ലക്ഷദീപ് റീജിയണൽ ഡയറക്ടർ സജിത് ബാബു, വി.എച്ച്.എസ്.ഇ എൻ.എസ്.എസ് സംസ്ഥാന പ്രോഗ്രാം കോർഡിനേറ്റർ പി. രഞ്ജിത് , ജില്ലാ കോർഡിനേറ്റർ ഡോ.വിപുൽ മുരളി, പി.എ.സി. മെമ്പർ ഐഷാ ഇസ്മായിൽ, പ്രോഗ്രാം ഓഫീസർ സമീർ സിദ്ദീഖി, പ്രിൻസിപ്പൽ റോണി മാത്യു, ഹെഡ്മാസ്റ്റർ കെ.സജികുമാർ, പി ടി.എ പ്രസിഡൻറ് പി.ടി.അനിൽകുമാർ, മദർ.പി.ടി.എ ചെയർപേഴ്സൺ സിനിജസനൽ, സ്കൂൾ വികസന സമിതി ചെയർമാൻ ടി.വി അവിരാച്ചൻ, ജെ.ആർ.സി ടീച്ചർ ഗിരിജ എം.പി തുടങ്ങിയവരുടെ നിർദ്ദേശങ്ങൾക്കനുസരിച്ചാണ് വിദ്യാർത്ഥികൾ പ്രവർത്തിക്കുന്നത്.

തയ്യൽ മെഷീൻ ഉള്ള വിദ്യാർത്ഥികൾ മാസ്ക് തയ്യാറാക്കും.

ബാക്കിയുള്ളവർ തുണികൾ വെട്ടിയൊരുക്കുകയും കെട്ടാനുള്ള ചരട് തയ്യാറാക്കുകയും ചെയ്യും.

കോട്ടൺ തുണിയാണ് ഇ ഉപയോഗിക്കുന്നത്.

പി.ടി.എ യുടെ സഹായവുമുണ്ട്.

ആരോഗ്യ വകുപ്പിന്റെ മുഴുവൻ മാനദണ്ഡങ്ങളും പാലിച്ചാണ് മാസ്ക് നിർമ്മാണം.