കൊച്ചി: കൊവിഡ് ആഘാതത്തിൽ നിന്നും കരകയറുന്നതിനായി വെജിറ്റബിൾ ആൻഡ് ഫ്രൂട്ട് പ്രൊമോഷൻ കൗൺസിൽ (വി.എഫ്.പി.സി.കെ) ആവിഷ്‌ക്കരിച്ച വെജിറ്റബിൾ ചലഞ്ചിന് തുടക്കമായി. കിച്ചൻ ഗാർഡൻ കിറ്റുകളുടെ വിതരണോദ്ഘാടനം മന്ത്രി വി.എസ്. സുനിൽകുമാർ ആദ്യകിറ്റ് അസി. കളക്ടർ എം.എസ് മാധവിക്കുട്ടിക്ക് കൈമാറി നിർവ്വഹിച്ചു.
വീട്ടാവശ്യത്തിനായുള്ള പച്ചക്കറികൾ സ്വയം ഉത്പാദിപ്പിക്കാൻ കുടുംബങ്ങളെ പര്യാപ്തമാക്കുന്നതിനാണ് കിച്ചൻ ഗാർഡൻ കിറ്റുകളുടെ വിതരണ പദ്ധതി. ആറിനം സസ്യ സംരക്ഷണോപാധികൾ ഉൾപ്പെടുന്ന വെജിറ്റബിൾ ചലഞ്ച് കിറ്റിന് 250 രൂപയാണ് വില. കൂടുതൽ സ്ഥലസൗകര്യമുള്ളവർക്കായി 10 ഇനങ്ങൾ ഉൾപ്പെടുന്ന 600 രൂപയുടെ കിറ്റുകളുണ്ട്.
ചെറിയ പച്ചക്കറിത്തോട്ടം ഒരുക്കുന്നതിനായുള്ള 250 രൂപയുടെ കിറ്റിൽ ഗ്രോബാഗ്, പച്ചക്കറി വിത്തുകൾ, പ്രോട്രെ, ജൈവവളം, ചകിരിചോറ് കമ്പോസ്റ്റ്, സ്യൂഡോമോണസ്, വേപ്പെണ്ണ എന്നിവയാണുള്ളത്. 600 രൂപയുടെ കിറ്റിൽ മേൽപ്പറഞ്ഞവയ്ക്ക് പുറമേ സമ്പുഷ്ട ചാണകപ്പൊടി, കപ്പലണ്ടി പിണ്ണാക്ക്, എല്ലുപൊടി, ഫിഷ് അമിനോആസിഡ് എന്നിവയും ഉൾപ്പെടുന്നു.
കിറ്റുകൾ വി.എഫ്.പി.സി.കെയുടെ കൃഷി ബിസിനസ് കേന്ദ്രങ്ങളിൽ ലഭ്യമാണ്. ജില്ലയിലെ നടുക്കരയിലുള്ള ഹൈടെക്ക് പച്ചക്കറി തൈ ഉത്പാദന കേന്ദ്രത്തിലും കിറ്റുകൾ ലഭിക്കും. കൊച്ചി നഗരത്തിലും പരിസര പ്രദേശങ്ങളിലുമുള്ള റസിഡന്റ് അസോസിയേഷനുകൾക്ക് 30 കിറ്റിൽ കുറയാത്ത ഓർഡറുകൾ എത്തിക്കുന്നതിനുള്ള സംവിധാനവും ഒരുക്കിയിട്ടുണ്ട്. വിശദാംശങ്ങൾക്കും ഓർഡറുകൾക്കുമായി വിളിക്കേണ്ട നമ്പർ 9497713883.