 ഉഴുന്നിനും ഉപ്പിനും നേരിയ ക്ഷാമം

തൊടുപുഴ: കോവിഡ് നിയന്ത്രണത്തിന്റെ ഭാഗമായി സംസ്ഥാന സർക്കാർ നൽകുന്ന സൗജന്യ ഭക്ഷ്യധാന്യ കിറ്റ് രണ്ടാംഘട്ട വിതരണത്തിന് ജില്ല തയ്യാർ. 3,​0​0,​749 കുടുംബങ്ങൾക്കാണ് ജില്ലയിലാകെ കിറ്റുകൾ ലഭിക്കുക. എ.എ.വൈ വിഭാഗത്തിന് അനുവദിച്ച 34008 കിറ്റുകളിൽ 31347 എണ്ണവും വിതരണം ചെയ്തു. 22ന് മുൻഗണനാ വിഭാഗത്തിലെ പിങ്ക് കാർഡുകാർക്കാണ് കിറ്റ് വിതരണം. നിലവിൽ കിറ്റുകളുടെ പാക്കിംഗ് അവസാനഘട്ടത്തിലാണ്. ഉഴുന്ന്,​ ഉപ്പ് എന്നിവയുടെ ക്ഷാമമുണ്ട്. ഇത് രണ്ട് ദിവസത്തിനകം പരിഹരിക്കുമെന്നാണ് ജില്ലാ സപ്ലൈ ഓഫീസ് അധികൃതർ പറയുന്നത്.

ആകെ കാർഡുടമകൾ- 3,​0​0,​749

എ.എ.വൈ (മഞ്ഞ)​- 34008

പി.എച്ച്.എച്ച് (പിങ്ക്)- 125064

എൻ.പി.എൻ.എസ് (വെള്ള)- ​71405

എൻ.പി.എസ് (നീല)​- 70272

അരിവിതരണം ഇന്ന് മുതൽ

കേന്ദ്ര സർക്കാരിന്റെ അരിവിതരണം ഇന്ന് മുതൽ ആരംഭിക്കും. 30 വരെ എ.എ.വൈ (മഞ്ഞ) പി.എച്ച്.എച്ച് (പിങ്ക്) കാർഡുകളിലെ അംഗങ്ങൾക്ക് ഒരംഗത്തിന് അഞ്ച് കിലോ ഗ്രാം അരി വീതം ലഭിക്കും. ഇന്നും നാളെയും എ.എ.വൈ (മഞ്ഞ) ​കാർഡുകൾക്കും, 22 മുതൽ 30 വരെ പി.എച്ച്.എച്ച് (പിങ്ക്) ​കാർഡുകൾക്കുമാണ് വിതരണം നടത്തുന്നത്. സൗജന്യ റേഷൻ വിതരണം ഒ.ടി.പി വഴിയായതിനാൽ കാർഡുമായി ലിങ്ക് ചെയ്ത മൊബൈൽ ഫോണുമായി വേണം ചെല്ലാൻ. സാമൂഹിക അകലം പാലിക്കണം. അഞ്ച് പേരിൽ കൂടുതൽ റേഷൻ കടയിൽ എത്തരുത്.