കണ്ണൂർ : ദണ്ഡിയാത്രയുടെ തൊണ്ണൂറാം വാർഷികദിനമായ നാളെ ജില്ലാ കോൺഗ്രസ് കമ്മിറ്റിയുടെ ആഭിമുഖ്യത്തിൽ വീടുകളിൽ രാഷ്ട്രപിതാവ് മഹാത്മജിയുടെ ഛായാചിത്രത്തിന് മുന്നിൽ പ്രതിജ്ഞയെടുത്ത് കൊവിഡ് പ്രതിരോധ ജാഗ്രതാ ദിനമായി ആചരിക്കും. ജില്ലയിലെ കോൺഗ്രസ് നേതാക്കളുടെയും പ്രവർത്തകരുടെയും വീടുകളിൽ രാവിലെ പത്തിന് സർക്കാറിന്റെ കൊവിഡ് 19 മാർഗ്ഗനിർദേശങ്ങൾ പാലിച്ചുകൊണ്ട് നാലു പേരിൽ കൂടാത്ത കുടുംബാംഗങ്ങൾ ചേർന്ന് സഹനസമരത്തിന്റെ ഓർമ്മകളും രാജ്യം പ്രതിസന്ധി ഘട്ടങ്ങളിൽ അനുവർത്തിക്കേണ്ട കടമകളും വിളംബരം ചെയ്യുന്ന പ്രതിജ്ഞയെടുക്കും.

ലോകത്തെ മുഴുവൻ ബാധിച്ച മഹാമാരിയെ നേരിടുന്നതിനു വേണ്ടിയുള്ള ജാഗ്രതാ പൂർണമായ ഇടപെടലുകളിൽ സർക്കാർ നിർദേശം പാലിച്ചുകൊണ്ട് ഗാന്ധിയൻ സമര രീതികൾ സ്മരിച്ചു കൊണ്ട് പ്രതിരോധ ഇടപെടലുകൾക്ക് ശക്തിപകരാനും ധാർമ്മിക പ്രചോദനമേകാനും ഉപയോഗപ്പെടുത്തുക എന്നുള്ളതാണ് സാമൂഹിക അകലം പാലിക്കുന്ന സമയത്തെ ദണ്ഡിയാത്ര അനുസ്മരണ പരിപാടി കൊണ്ട് ഉദ്ദേശിക്കുന്നതെന്ന് ഡി.സി.സി പ്രസിഡന്റ് സതീശൻ പാച്ചേനി പറഞ്ഞു.