കാസർകോട് : കൊവിഡ്19 രോഗബാധിതരുടെ എണ്ണം ദിനപ്രതി വർദ്ധിക്കുന്ന സാഹചര്യത്തിൽ ജില്ലയിലെ ആരോഗ്യമേഖലയ്ക്ക് കൈതാങ്ങായി തങ്ങളുടെ പ്രത്യേക ഫണ്ട് നൽകി റവന്യു മന്ത്രി അടക്കമുള്ള ജനപ്രതിനിധികൾ. നൂതന ചികിത്സ സൗകര്യം ഒരുക്കുന്നതിന് ഈ തുക ജില്ലാ ഭരണകൂടത്തിന് കൈമാറും .ഈ തുക ആരോഗ്യരംഗത്തെ ഗുണപരമായ മാറ്റങ്ങൾക്ക് വിനിയോഗിക്കുമെന്ന് ജില്ലാ കളക്ടർ ഡോ. ഡി .സജിത് ബാബു പറഞ്ഞു. നേരത്തെ കെ .എസ്. ഇ .ബി നൽകിയ സാമൂഹ്യ പ്രതിബദ്ധത ഫണ്ട് ഉപയോഗിച്ച് കാസർകോട് മെഡിക്കൽ കോളജിൽ അത്യാധുനിക മെഡിക്കൽ ഉപകരണങ്ങൾ കൂടി സജ്ജീകരിക്കും

കാഞ്ഞങ്ങാട് ജില്ലാ ആശുപത്രിയിൽ ചികിത്സയ്ക്ക് ആവശ്യമായ നൂതന സംവിധാനങ്ങൾ ഒരുക്കാൻ റവന്യൂ വകുപ്പ് മന്ത്രിയും കാഞ്ഞങ്ങാട് നിയോജക മണ്ഡലം എം എൽ എയുമായ ഇ ചന്ദ്രശേഖരന്റെ ആസ്തിവികസന ഫണ്ടിൽ നിന്ന് ഒരു കോടി രൂപയാണ് അനുവദിച്ചത്.

രാജ്‌മോഹൻ ഉണ്ണിത്താൻ എം പി യുടെ പ്രാദേശിക വികസന ഫണ്ടിൽ നിന്ന് 56.25 ലക്ഷം രൂപ ചെലവഴിച്ച് പേഴ്സണൽ പ്രോട്ടക്ഷൻ എക്യൂപ്പ്‌മെന്റും സുരക്ഷാ സാമഗ്രികളും വാങ്ങും.എൻ .എ. നെല്ലിക്കുന്ന് എം .എൽ. എ കൊവിഡ് പ്രതിരോധ പ്രവർത്തനങ്ങളുടെ ഭാഗമായി കാസർകോട് ജനറൽ ആശുപത്രിയിൽ സുരക്ഷാ ഉപകരണങ്ങൾ വാങ്ങുന്നതിന് എൻ .എ. നെല്ലിക്കുന്ന് എം .എൽ .എ യുടെ ആസ്തിവികസന ഫണ്ടിൽ 25 ലക്ഷം രൂപയും നൽകി.

രാജ്യസഭാംഗം സുരേഷ് ഗോപി പ്രാദേശിക വികസന നിധിയിൽ നിന്ന് 25 ലക്ഷം രൂപ ജനറൽ ആശുപത്രിയിൽ വെന്റിലേറ്ററും പോർട്ടബിൾ എക്‌സ് റേ മെഷീനും സ്ഥാപിക്കുന്നതിന് അനുവദിച്ചിട്ടുണ്ട്.

ജനറൽ ആശുപത്രിയിൽ വെന്റിലേറ്ററുകളും പോർട്ടബിൾ എക്സ്‌റേയൂണിറ്റും സ്ഥാപിക്കുന്നതിന് രാജ്യസഭാംഗം ബിനോയ് വിശ്വത്തിന്റെ പ്രാദേശിക വികസന ഫണ്ടിൽ നിന്ന് 25 ലക്ഷം രൂപ നല്കി.