മലപ്പുറം: 53 കാരിയായ വീട്ടമ്മ കാട്ടാനയുടെ ആക്രമണത്തിൽ മരിച്ചു. വനത്തിൽ വിറക് ശേഖരിക്കാൻ പോയ മമ്പാട് പുള്ളിപ്പാടത്തെ അസ്മാബിയാണ് മരിച്ചത്. എടവണ്ണ റേഞ്ചിലെ ഒന്നാം തോട് വനമേഖലയിൽ വച്ചാണ് അസ്മാബിയെ കാട്ടാന ആക്രമിച്ചത്. ഇന്നലെ രാവിലെ പത്ത് മണിയോടെയാണ് സംഭവം.

വിറക് ശേഖരിക്കുന്നതിനിടെ കാട്ടാന അക്രമിക്കുകയായിരുന്നു. കൂടെയുണ്ടായിരുന്ന ഖദീജ ആനയുടെ ആക്രമണത്തിൽ നിന്നും ഓടി രക്ഷപ്പെട്ടു. ആനയുടെ തട്ടേറ്റ് തെറിച്ച് വീണ അസ്മാബി മരത്തിൽ ഇടിച്ച് വീണു. ഉടനെ നിലമ്പൂർ ജില്ലാ ആശുപത്രിയിലും പിന്നീട് പെരിന്തൽമണ്ണ അൽഷിഫ ആശുപത്രിയിലുമെത്തിച്ചെങ്കിലും വൈകുന്നേരത്തോടെ മരിച്ചു. വനം വകുപ്പിലെ താത്കാലിക ജീവനക്കാരൻ കുഞ്ഞാലൻകുട്ടിയാണ് ഭർത്താവ്. മക്കൾ: സുനീർ, നിഷാദ്, ജംഷീർ, ജംഷീന, സിയാദ്. മരുമക്കൾ: ഷാജി, ഉമ്മുഹബീബ, ഫെബിന, ഷംല.