കണ്ണൂർ: ജില്ലാ പഞ്ചായത്തിന്റെ കോൾ സെന്ററിൽ വൊളണ്ടിയറായി തെന്നിന്ത്യൻ സിനിമാതാരം ആത്മീയ രാജനുമെത്തി. വെള്ളിയാഴ്ച രാവിലെ കാൾ സെന്ററിൽ എത്തിയ താരം ആവശ്യക്കാരുടെ കാളുകൾ സ്വീകരിച്ചു.

ജോസഫ്, അവിയൽ എന്നീ സിനിമകളിലൂടെ പ്രശസ്തയായ ആത്മീയ നഴ്‌സിംഗ് ബിരുദധാരി കൂടിയാണ്. തന്റെ സഹപാഠികളൊക്കെ സേവന മേഖലയിൽ സജീവമായപ്പോൾ തനിക്കും കടമ നിറവേറ്റണമെന്ന ആഗ്രഹത്തെത്തുടർന്നാണ് കാൾസെന്ററിലെത്തിയതെന്നും കാൾസെന്ററിന്റെ പ്രവർത്തനം ഏറെ ഉപകാരപ്രദമാണെന്നും ആത്മീയ പറഞ്ഞു. സിനിമ താരങ്ങളും മറ്റു പ്രമുഖരുമുൾപ്പടെയുള്ളവർ വിവിധ ദിവവസങ്ങളിലായി കാൾ സെന്ററിന്റെ ഭാഗമാകുന്നുണ്ട്.