കണ്ണൂർ: ജില്ലയിൽ കൊവിഡ് -19 ബാധിച്ച് വിവിധ കേന്ദ്രങ്ങളിൽ പ്രവേശിപ്പിക്കപ്പെട്ട 8 പേർ കൂടി രോഗം ഭേദമായി ആശുപത്രി വിട്ടു. ഇതോടെ 64 കൊവിഡ് ബാധിതരിൽ 37 പേരും വീടുകളിലേക്ക് മടങ്ങി. ബാക്കി 27 പേർ വിവിധ ആശുപത്രികളിൽ ചികിത്സയിലാണ്.
അഞ്ചരക്കണ്ടി കൊവിഡ് 19 ചികിത്സാ കേന്ദ്രത്തിൽ നിന്ന് കോട്ടയം മലബാർ, കതിരൂർ, അഞ്ചരക്കണ്ടി, പാനൂർ സ്വദേശികളും കണ്ണൂർ ജില്ലാ ആശുപത്രിയിൽ നിന്ന് എടയന്നൂർ സ്വദേശിയും, തലശ്ശേരി ജനറൽ ആശുപത്രിയിൽ നിന്ന് മൊകേരി സ്വദേശിയുമാണ് രോഗം ഭേദമായി ഇന്നലെ വീട്ടിലേക്ക് മടങ്ങിയത്. എറണാകുളം ഗവ: മെഡിക്കൽ കോളേജിൽ (കളമശ്ശേരി) ചികിത്സയിലായിരുന്ന കൂത്തുപറമ്പ് സ്വദേശികളായ രണ്ട് പേർ കൂടി ഇന്നലെ രോഗം ഭേദമായി വീട്ടിലേക്കു മടങ്ങി.
നിലവിൽ 8182 പേരാണ് ജില്ലയിൽ കൊറോണ നിരീക്ഷണത്തിലുള്ളത്. 47 പേർ കണ്ണൂർ ഗവ. മെഡിക്കൽ കോളേജിലും 11 പേർ കണ്ണൂർ ജില്ലാ ആശുപത്രിയിലും 7 പേർ തലശ്ശേരി ജനറൽ ആശുപത്രിയിലും 46 പേർ അഞ്ചരക്കണ്ടി ജില്ലാ കൊവിഡ് 19 ചികിത്സാ കേന്ദ്രത്തിലും 8071 പേർ വീടുകളിലുമാണുള്ളത്. ഇതുവരെയായി ജില്ലയിൽ നിന്നും 933 സാമ്പിളുകൾ പരിശോധനയ്ക്കയച്ചതിൽ 799 എണ്ണത്തിന്റെ ഫലം ലഭ്യമായിട്ടുണ്ട്. 134 എണ്ണത്തിന്റെ ഫലം ലഭിക്കാനുണ്ട്.