കണ്ണൂർ: ജില്ലയിൽ ഒരാൾക്കു കൂടി ഇന്നലെ കൊവിഡ് 19 സ്ഥിരീകരിച്ചതായി ജില്ലാ കളക്ടർ ടി.വി. സുഭാഷ് അറിയിച്ചു. മൂര്യാട് സ്വദേശിയായ 40കാരനിലാണ് പുതുതായി രോഗബാധ കണ്ടെത്തിയത്. മാർച്ച് 17ന് ദുബായിൽ നിന്ന് കരിപ്പൂർ വിമാനത്താവളം വഴി നാട്ടിലെത്തിയ ഇദ്ദേഹം, ഏപ്രിൽ 10ന് സ്രവ പരിശോധനയ്ക്ക് വിധേയനായിരുന്നു.
ജില്ലയിൽ നിലവിൽ 7836 പേർ കൊറോണ ബാധ സംശയിച്ച് നിരീക്ഷണത്തിലുണ്ട്. കണ്ണൂർ ഗവ. മെഡിക്കൽ കോളേജ് ആശുപത്രിയിൽ 52 പേരും തലശ്ശേരി ജനറൽ ആശുപത്രിയിൽ 9 പേരും ജില്ലാ ആശുപത്രിയിൽ 10 പേരും കൊവിഡ് ട്രീറ്റ്‌മെന്റ് സെന്ററിൽ 31 പേരും 7734 പേർ വീടുകളിലുമാണുള്ളത്. ഇതുവരെ 1189 സാമ്പിളുകൾ പരിശോധനയ്ക്ക് അയച്ചതിൽ 902 എണ്ണത്തിന്റെ ഫലം വന്നു. ഇതിൽ 824 എണ്ണം നെഗറ്റീവാണ്. 287 എണ്ണത്തിന്റെ ഫലം ലഭിക്കാനുണ്ട്.