കണ്ണൂർ: ജില്ലയിൽ രണ്ടു പേർക്കു കൂടി ഇന്നലെ കൊറോണ സ്ഥിരീകരിച്ചതായി ജില്ലാ കളക്ടർ ടി.വി. സുഭാഷ് അറിയിച്ചു. ന്യൂമാഹി പെരിമുണ്ടേരി സ്വദേശിയായ 74 കാരനും മാടായി സ്വദേശിയായ 36കാരിക്കുമാണ് പുതുതായി വൈറസ് ബാധ സ്ഥിരീകരിച്ചത്. ഇരുവർക്കും സമ്പർക്കത്തിലൂടെയാണ് രോഗബാധയുണ്ടായത്. പെരിമുണ്ടേരി സ്വദേശി ഏപ്രിൽ 11ന് തലശ്ശേരി ജനറൽ ആശുപത്രിയിലും മാടായി സ്വദേശി ഏപ്രിൽ 10ന് കണ്ണൂർ ഗവ. മെഡിക്കൽ കോളേജിലുമാണ് സ്രവ പരിശോധനയ്ക്ക് വിധേയരായത്.
ഇതോടെ ജില്ലയിൽ കൊറോണ ബാധിതരുടെ എണ്ണം 75 ആയി. ഇതുവരെ 38 പേരാണ് ജില്ലയിൽ രോഗം ഭേദമായി ആശുപത്രി വിട്ടത്. ജില്ലാ ആശുപത്രിയിൽ നിന്ന് ഇന്നലെ. ഒരാൾ കൂടി ഡിസ്ചാർജായിരുന്നു. നിലവിൽ 59 പേർ കണ്ണൂർ ഗവ. മെഡിക്കൽ കോളേജിലും എട്ടു പേർ കണ്ണൂർ ജില്ലാ ആശുപത്രിയിലും ഏഴു പേർ തലശ്ശേരി ജനറൽ ആശുപത്രിയിലും 36 പേർ അഞ്ചരക്കണ്ടി ജില്ലാ കോവിഡ് ചികിത്സാ കേന്ദ്രത്തിലും 7687 പേർ വീടുകളിലുമായി ആകെ 7797 പേർ ജില്ലയിൽ നിരീക്ഷണത്തിലുണ്ട്. ഇതുവരെയായി ജില്ലയിൽ നിന്നും 1314 സാമ്പിളുകൾ പരിശോധനയ്ക്കയച്ചതിൽ 1063 എണ്ണത്തിന്റെ ഫലം ലഭ്യമായി. 251 എണ്ണത്തിന്റെ ഫലം ബാക്കിയുണ്ട്.

തെയ്യംതിറ
ഉത്സവം മാറ്റിവച്ചു

കാപ്പാട്: കോവിഡ് 19 പകർച്ചവ്യാധിയുടെ പശ്ചാതലത്തിലും സർക്കാർ നിർദേശങ്ങൾ ഉള്ളതിനാലും കൊട്ടുമ്പ്രം പരക്കുന്നംചാൽ ഭഗവതി ക്ഷേത്രത്തിൽ 17,18,19 തീയതികളിൽ നടക്കേണ്ടിയിരുന്ന തെയ്യംതിറ മഹോത്സവം മാറ്റിവച്ചതായി ക്ഷേത്രം ഭാരവാഹികൾ അറിയിച്ചു.