കണ്ണൂർ: കൊവിഡ് -19 സാമൂഹ്യ വ്യാപനം തടയുന്നതിന്റെ ഭാഗമായി റെഡ് സോണായി പ്രഖ്യാപിച്ച ന്യൂമാഹിയിൽ അനാവശ്യമായി വീടുകളിൽ നിന്ന് പുറത്തിറങ്ങിയ മൂന്നു പേരെ പൊലീസ് പിടികൂടി കൊവിഡ് കെയർ സെന്ററിലേക്കയച്ചു. പെരിങ്ങാടി സ്വദേശികളായ രണ്ടു പേരെയും കണ്ണൂക്കര സ്വദേശിയായ ഒരാളെയുമാണ് ന്യൂമാഹി എസ്‌.ഐ രതീഷും സംഘവും പിടികൂടിയത്. രണ്ടു പേർ കടകൾ തുറന്നിട്ടുണ്ടോ എന്നറിയാനും ഒരാൾ വീട്ടിൽ പഞ്ചറായിക്കിടന്ന വാഹനം നന്നാക്കാൻ വർക്ക് ഷോപ്പ് തുറന്നിട്ടുണ്ടോ എന്നറിയാനുമാണ് പുറത്തിറങ്ങിയതെന്നാണ് പൊലിസിനോട് പറഞ്ഞത്.

ഇന്നലെ ഉച്ചയോടെ പിടിയിലായ മൂന്നു പേരെയും കണ്ണൂർ താണയിലെ കൊവിഡ് കെയർ സെന്ററിലേക്ക് ആംബുലൻസിലാണ് മാറ്റിയത്. ജില്ലയിൽ കൂടുതൽ കൊവിഡ‌് പോസിറ്റീവ് കേസുകൾ റിപ്പോർട്ട് ചെയ്യപ്പെട്ട അഞ്ച് തദ്ദേശ സ്ഥാപനങ്ങൾ റെഡ് സോണിലും ഏഴ് തദ്ദേശ സ്ഥാപനങ്ങൾ ഓറഞ്ച് സോണിലും ഉൾപ്പെടുത്തി ജില്ലാ കളക്ടർ കഴിഞ്ഞ ദിവസം ഉത്തരവിറക്കിയിരുന്നു. റെഡ് സോണിൽ മരുന്നു ഷോപ്പ് ഒഴികെയുള്ള കടകളൊന്നും തുറക്കരുതെന്നും ആളുകൾ പുറത്തിറങ്ങരുതെന്നുമാണ് നി‌ർദ്ദേശം.