മംഗളൂരു : കൊവിഡ് വ്യാപനത്തെ തുടർന്ന് നിയന്ത്രണങ്ങൾ കർശനമാക്കുന്നതിനിടെ കർണാടകയിൽ ലോക്ക് ഡൗൺ ലംഘിച്ച് ക്ഷേത്രത്തിൽ രഥോത്സവം നടത്തി. കർണാടക കൽബുർഗിയിൽ രാവൂർ സിദ്ധലിംഗേശ്വര ക്ഷേത്രത്തിലാണിത്. ക്ഷേത്രത്തിന് ചുറ്റും രഥം വലിക്കുന്ന ആഘോഷപൂർവമായ ചടങ്ങിൽ 200 ലധികം ഭക്തർ പങ്കെടുത്തു.

നിരവധിപ്പേർക്ക് രോഗം ബാധിച്ചതിനെ തുടർന്ന് കൊവിഡ് ഹോട്ട്സ്‌പോട്ടായി പ്രഖ്യാപിച്ച പ്രദേശത്തിന് രണ്ട് കിലോമീറ്റർ അകലെയാണ് രഥോത്സവം നടത്തിയ ക്ഷേത്രം സ്ഥിതി ചെയ്യുന്നത്. രഥോത്സവത്തിന്റെ ദൃശ്യങ്ങൾ സോഷ്യൽ മീഡിയയിൽ പ്രചരിച്ചതോടെയാണ് സംഭവം അധികൃതരുടെ ശ്രദ്ധയിൽപ്പെട്ടത്. നിയന്ത്രണം ലംഘിച്ചതിന് ക്ഷേത്രം ഭാരവാഹികളുടെ പേരിൽ കൽബുർഗി പൊലീസ് കേസെടുത്തു.