കൂത്തുപറമ്പ്: കൊവിഡ് പ്രതിരോധ പ്രവർത്തകർക്ക് ഐക്യദാഢ്യമർപ്പിച്ച് കൂത്തുപറമ്പിൽ തയ്യാറാക്കിയ കൊവിഡ് വാർ ഇൻ കേരള പെയിന്റിംഗ് നാളെ നാടിന് സമർപ്പിക്കും. വൈകിട്ട് 5 മണിക്ക് ജില്ലാ പൊലീസ് മേധാവി യതീഷ് ചന്ദ്ര ഉദ്ഘാടനം നിർവ്വഹിക്കും. 160 അടി നീളത്തിലും 50 അടി വീതിയിലുമാണ് തയ്യാറാക്കിയിട്ടുള്ളത്. കേരളത്തിലെ 14 ജില്ലകളുടെയും പശ്ചാത്തലത്തിൽ കൊവിഡിനെതിരെ നടന്ന പോരാട്ടമാണ് ചിത്രത്തിൽ രേഖപ്പെടുത്തിയിട്ടുള്ളത്.

മുഖ്യമന്ത്രി പിണറായി വിജയൻ ,ആരോഗ്യ മന്ത്രി കെ.കെ.ശൈലജ എന്നിവരുടെ നേതൃത്വത്തിൽ കൊവിഡിനെതിരായ പോരാട്ടം നയിക്കുന്ന ആരോഗ്യ പ്രവർത്തകർ, പൊലീസ് ഉദ്യോഗസ്ഥർ, ഫയർഫോഴ്സ് ഉദ്യോഗസ്ഥർ, സന്നദ്ധ പ്രവർത്തകർ, മാധ്യമ പ്രവർത്തകർ എന്നിവരെയെല്ലാം ചിത്രത്തിൽ ആലേഖനം ചെയ്യുന്നുണ്ട്. ചിത്രകാരൻ ഷൈജു കെ.മാലൂരിന്റെ നേതൃത്വത്തിലുള്ള പത്തോളം കലാകാരന്മാർ ച്ചേർന്ന് ഒരാഴ്ച്ചയോളമെടുത്താണ് ചിത്രം വരച്ചത്. ഉദ്ഘാടനത്തോടനുബന്ധിച്ച് കൊവിഡിനെതിരെ പൊരുതുന്ന ആരോഗ്യ പ്രവർത്തകർക്കും, പൊലീസിനും, സന്നന്ധ പ്രവർത്തകർക്കും ഐക്യദാർഢ്യം പ്രഖ്യപിച്ച് മൺചിരാതുകൾ തെളിയിക്കും. കേരളത്തിൽ ആദ്യമായിട്ടാണ് കൊവിഡിനെതിരെ പൊതുനിരത്തിൽ ഇത്രയും വലിയ ചിത്രം വരച്ചിട്ടുള്ളതെന്ന് കൂത്തുപറമ്പ് എസ്.ഐ. പി.ബിജു പറഞ്ഞു.കൂത്തുപറമ്പ് ബസ്സ് സ്റ്റാൻഡിന് സമീപം മെയിൻ റോഡിലാണ് ചിത്രം ഒരുക്കിയിരിക്കുന്നത്.

(Photo കോവിഡ് വാർ ഇൻ കേരള പെയിന്റിംഗ്)