കണ്ണൂർ: ജില്ലയിൽ മൂന്നു പേർക്കു കൂടി ഇന്നലെ കൊവിഡ് 19 സ്ഥിരീകരിച്ചതായി ജില്ലാ കളക്ടർ ടി.വി സുഭാഷ് അറിയിച്ചു. രണ്ടു പേർ ദുബായിൽ നിന്നെത്തിയവരാണ്. ഒരാൾ സമ്പർക്കത്തിലൂടെയാണ് രോഗബാധിതയായത്. ഇതോടെ ജില്ലയിൽ കൊവിഡ് ബാധിതരുടെ എണ്ണം 116 ആയി.
മാർച്ച് 17ന് ഐഎക്‌സ് 344 വിമാനത്തിൽ കരിപ്പൂർ വഴിയെത്തിയ മൂര്യാട് സ്വദേശി 21 കാരനും മാർച്ച് 21ന് ഐഎക്‌സ് 434 ൽ നെടുമ്പാശ്ശേരി വഴിയെത്തിയ ചെറുവാഞ്ചേരി സ്വദേശി 20കാരിയുമാണ് ദുബായിൽ നിന്നെത്തിയ രണ്ടു പേർ. മൂര്യാട് സ്വദേശിയായ 40കാരനാണ് സമ്പർക്കത്തിലൂടെ രോഗബാധിതനായത്. അഞ്ചരക്കണ്ടി ജില്ലാ കൊവിഡ് ചികിത്സാ കേന്ദ്രത്തിൽ കഴിഞ്ഞ 26നാണ് മൂന്നു പേരും സ്രവ പരിശോധനയ്ക്ക് വിധേയരായത്.

ജില്ലയിൽ സമൂഹവ്യാപന സാധ്യത കണ്ടെത്താനായി 300 പേരുടെ സാമ്പിൾ ശേഖരിച്ചതിലുൾപ്പെട്ടവരാണിവർ. മാർച്ച് 12ശേഷം വിദേശത്ത് നിന്നെത്തിയവരുടെയെല്ലാം സാമ്പിളുകൾ പരിശോധിക്കാൻ ജില്ലാ ഭരണകൂടം തീരുമാനിച്ചിരുന്നു. അതിനിടെ, ജില്ലയിൽ നിന്ന് രണ്ടു പേർ കൂടി ഇന്നലെ രോഗം ഭേദമായി ആശുപത്രി വിട്ടു. ഇതോടെ ആശുപത്രിവിട്ടവരുടെ എണ്ണം 66 ആയി.
ജില്ലയിൽ നിലവിൽ 2552 പേരാണ് നിരീക്ഷണത്തിലുള്ളത്. കണ്ണൂർ ഗവ. മെഡിക്കൽ കോളേജ് ആശുപത്രിയിൽ 49 പേരും തലശ്ശേരി ജനറൽ ആശുപത്രിയിൽ ഏഴ് പേരും ജില്ലാ ആശുപത്രിയിൽ 14 പേരും കൊവിഡ് ട്രീറ്റ്‌മെന്റ് സെന്ററിൽ 33 പേരും വീടുകളിൽ 2449 പേരുമാണ് നിരീക്ഷണത്തിൽ കഴിയുന്നത്. ഇതുവരെ 2960 സാമ്പിളുകൾ പരിശോധനയ്ക്ക് അയച്ചതിൽ 2801 എണ്ണത്തിന്റെ ഫലം വന്നു. 2626 എണ്ണം നെഗറ്റീവാണ്. 159 എണ്ണത്തിന്റെ ഫലം ലഭിക്കാനുണ്ട്.