കണ്ണൂർ: കൊവിഡ് ബാധിച്ച് ആശുപത്രിയിൽ ചികിത്സയിലായിരുന്ന മൂന്നു പേർ കൂടി ഇന്നലെ രോഗം ഭേദമായി ആശുപത്രി വിട്ടു. ജില്ലാ ആശുപത്രിയിൽ ചികിത്സയിലായിരുന്ന പെരളശ്ശേരി സ്വദേശിയായ 34കാരി, ചെറുവാഞ്ചേരി സ്വദേശിയായ 27കാരൻ, ഇരിവേരി സ്വദേശിയായ 25കാരൻ എന്നിവരാണ് ആശുപത്രി വിട്ടത്. ഇതോടെ ജില്ലയിൽ കൊവിഡ് മുക്തരായി ആശുപത്രി വിട്ടവരുടെ എണ്ണം 69 ആയി. ജില്ലയിൽ ആകെയുള്ള 116 കൊവിഡ് പോസിറ്റീവ് കേസുകളിൽ ബാക്കി 47 പേർ വിവിധ ആശുപത്രികളിൽ ചികിത്സയിലാണ്.
ജില്ലയിൽ നിലവിൽ 2681 പേർ നിരീക്ഷണത്തിൽ കഴിയുന്നുണ്ട്. 50 പേർ കണ്ണൂർ ഗവ. മെഡിക്കൽ കോളേജിലും 11 പേർ കണ്ണൂർ ജില്ലാ ആശുപത്രിയിലും മൂന്നു പേർ തലശ്ശേരി ജനറൽ ആശുപത്രിയിലും 38 പേർ അഞ്ചരക്കണ്ടി ജില്ലാ കൊവിഡ് ചികിത്സാ കേന്ദ്രത്തിലും 2579 പേർ വീടുകളിലുമാണ് നിരീക്ഷണത്തിലുള്ളത്. ഇതുവരെയായി ജില്ലയിൽ നിന്നും 3094 സാമ്പിളുകൾ പരിശോധനയ്ക്കയച്ചതിൽ 2844 എണ്ണത്തിന്റെ ഫലം ലഭ്യമായി. 250 എണ്ണത്തിന്റെ ഫലം ലഭിക്കാനുണ്ട്.