കൽപ്പറ്റ: കോവിഡ്-19 പകർച്ചവ്യാധിയുമായി ബന്ധപ്പെട്ട് സാമൂഹിക മാധ്യമങ്ങളിലൂടെ വ്യാജപ്രചരണം നടത്തി ജനങ്ങളിൽ പരിഭ്രാന്തി സൃഷ്ടിച്ചതിന് വാട്ട്സ്ആപ്പ് ഗ്രൂപ്പ് അഡിമിൻമാരായ കമ്പളക്കാട്ടെ അഷറഫ്, നെയിം, മൻസൂർ, ഷൈജൽ എന്നിവർക്കെതിരെ കമ്പളക്കാട് പൊലീസ് സ്‌റ്റേഷനിൽ കേസ് രജിസ്റ്റർ ചെയ്തു. കമ്പളക്കാട് പാമ്പോടൻ വീട്ടിൽ അഷറഫി (40) നെ അറസ്റ്റ് ചെയ്തു. ഇയാളെ പിന്നീട് ജാമ്യത്തിൽ വിട്ടു. ഈ കേസിൽ ഇനിയും കൂടുതൽ അറസ്റ്റ് ഉണ്ടാകുമെന്നും ഇത്തരം വ്യാജപ്രചാരണം നടത്തുന്നവർക്കെതിരെ തുടർന്നും നടപടി സ്വീകരിക്കുമെന്നും ജില്ലാ പൊലീസ് മേധാവി അറിയിച്ചു.