ഉള്ളിയേരി: കൊവിഡ്-19 കാലത്തെ അതിജീവനത്തിനായി വീടുകളിൽ കഴിയുന്ന വിദ്യാർത്ഥികൾക്ക് നൈപുണി വികസനത്തിന് അവസരമൊരുക്കി ജില്ലാ എൻ.എസ്.എസ് സെൽ. രക്ഷിതാക്കളുടെ സഹായത്തോടെ പാചകം, തയ്യൽ, ശുചീകരണ സാധനങ്ങളുടെ നിർമാണം, ജൈവ കൃഷി, പൂന്തോട്ട നിർമ്മാണം , ജൈവ വളങ്ങളുടെയും കരകൗശല വസ്തുക്കളുടെയും നിർമ്മാണം, പെയിന്റിംഗ്, മത്സ്യം വളർത്തൽ, ഔഷധത്തോട്ട നിർമ്മാണം, നാട്ടറിവ് ശേഖരണം എന്നിവയിൽ വിദ്യാർത്ഥികൾ പ്രാവീണ്യം നേടും. വീടുകളിൽ അമ്മമാരുടെ നേതൃത്വത്തിൽ മാസ്കുകൾ നിർമിച്ച് ആരോഗ്യ പ്രവർത്തകർക്ക് കൈമാറും. ജില്ലയിലെ 139 എൻ.എസ്.എസ് യൂണിറ്റുകളിലെ 13900 വളണ്ടിയർമാർ അവരുടെ കുടുംബാംഗങ്ങളോടൊപ്പം വീടുകൾ ശുചീകരിക്കും. മികച്ച പ്രവർത്തനം കാഴ്ചവയ്ക്കുന്ന കുട്ടികൾക്ക് ജില്ലാ തലത്തിൽ സമ്മാനം നൽകും. പരിപാടിയുടെ ഉദ്ഘാടനം ഓൺലൈനിലൂടെ ജില്ലാ പഞ്ചായത്ത് പ്രസിഡന്റ് ബാബു പറശ്ശേരി നിർവഹിച്ചു. എൻ.എസ്.എസ് ജില്ലാ കോ ഓർഡിനേറ്റർ എസ്. ശ്രീചിത്ത്, ക്ലസ്റ്റർ കൺവീനർമാരായ എം.സതീഷ് കുമാർ , കെ.എൻ.റഫീഖ് , എ.പി.മിനി, എം.കെ.ഫൈസൽ എന്നിവർ പദ്ധതിക്ക് നേതൃത്വം നൽകുന്നു.