കോട്ടയം:ഒൻപതാം ക്ലാസുകാരൻ കഞ്ചാവിനായി കേണപേക്ഷിച്ചു. സ്ഥിരം കസ്റ്റമറായ വിദ്യാർത്ഥിക്ക് വീട്ടിൽ കഞ്ചാവ് എത്തിക്കാൻ ബൈക്കിൽ പോയ രണ്ട് യുവാക്കൾ പിടിയിൽ. കിടങ്ങൂർ പള്ളിക്കര അഖിൽ, ആനിക്കാട് തേക്കിലകാട്ടിൽ വിഷ്ണു എന്നിവരെയാണ് ഈരാറ്റുപേട്ട പൊലീസ് പിടികൂടിയത്. ഇവരിൽ നിന്ന് 60 ഗ്രാം കഞ്ചാവ് പിടിച്ചെടുത്തു.

കിടങ്ങൂരിലെ ഒരു സ്കൂളിലെ വിദ്യാർത്ഥി മൊബൈലിൽ വിളിച്ചുപറഞ്ഞിട്ടാണ് കഞ്ചാവുമായി പോയതെന്ന് അഖിൽ പൊലീസിനോട് പറഞ്ഞു. വിദ്യാർത്ഥി വിളിച്ച നമ്പറും മൊബൈലിൽ അഖിൽ കാണിച്ചുകൊടുത്തു. ലോക്ക്ഡൗണിന്റെ ഭാഗമായി ഈരാറ്റുപേട്ട സി.ഐ ബൈജുകുമാർ വാഹനങ്ങൾ പരിശോധിക്കുന്നതിനിടയിലാണ് ഇവർ ബൈക്കിൽ എത്തിയത്.

എങ്ങോട്ടു പോവുന്നുവെന്ന് ചോദിച്ചതോടെ യുവാക്കൾ പേടിച്ചരണ്ടു. തുടർന്ന് ബൈക്ക് പരിശോധിച്ചപ്പോഴാണ് രണ്ട് പൊതികളിലായി 60 ഗ്രാം കഞ്ചാവ് കണ്ടെത്തിയത്. ഇതോടെ ഇവരെ അറസ്റ്റ് ചെയ്യുകയായിരുന്നു. ബൈക്കും പൊലീസ് പിടിച്ചെടുത്തു.