പൊൻകുന്നം: ചിറക്കടവ് പഞ്ചായത്തിൽ ഏഴാം വാർഡില്‍ രണ്ട് ക്യാമ്പുകളിൽ കഴിയുന്ന 12 അന്യസംസ്ഥാനത്തൊഴിലാളികൾക്ക് പഞ്ചായത്തംഗത്തിന്റെ നേതൃത്വത്തിൽ നാട്ടുകാർ ഭക്ഷണം നൽകും. വാര്‍ഡംഗം പി.സി. റോസമ്മയുടെ നേതൃത്വത്തിൽ ഇന്നലെ ഇവർക്ക് 15 കിലോഗ്രാം അരിയും അനുബന്ധ സാധനങ്ങളും എത്തിച്ചു നല്‍കി.
തൊഴിലാളികൾക്ക് ഭക്ഷണം നല്‍കുന്നതിന് റവന്യു അധികൃതരുമായി ബന്ധപ്പെട്ടപ്പോള്‍ കരാറുകാരനോ, വീട് വാടകയ്ക്കു നൽകിയവരോ ഭക്ഷണം നല്‍കണമെന്നും അല്ലാത്ത പക്ഷം വാർഡംഗം സാധനങ്ങൾ വാങ്ങി നല്‍കണമെന്നുമാണ് തഹസില്‍ദാർ പറഞ്ഞതെന്ന് പി.സി.റോസമ്മ പറഞ്ഞു.
ചെറിയ രീതിയില്‍ കരാർ ജോലികള്‍ നടത്തുന്നവരുടെ കീഴിലാണ് ഇവർ ജോലി ചെയ്യുന്നത്. ഇവർക്ക് എല്ലാ ദിവസവും ഭക്ഷണം ഒരുക്കുക എന്നത് സാമ്പത്തിക കരാറുകാർക്ക് കഴിയില്ലെന്നും റോസമ്മ പറയുന്നു. ഇത്തരത്തില്‍ മേഖലയിൽ താമസിക്കുന്ന തൊഴിലാളികൾക്കു ചില സന്നദ്ധ സംഘടനകളാണ് ഭക്ഷണ സാധനങ്ങൾ എത്തിച്ചു നൽകുന്നത്.
സമൂഹ അടുക്കളയില്‍ നിന്നു ഭക്ഷണം ലഭിച്ചിരുന്ന ഇവർക്ക് കിറ്റ് നൽകുന്ന ഉത്തരവ് വന്നതോടെ കഴിഞ്ഞ ദിവസം വാര്‍ഡംഗം പണം നല്‍കി അതിഥി തൊഴിലാളികൾക്ക് ജനകീയ ഹോട്ടലില്‍ നിന്നു ഭക്ഷണം വാങ്ങി നല്‍കിയിരുന്നു.