കോട്ടയം : കേരള കോൺഗ്രസ് (എം) ചെയർമാനായിരുന്ന കെ.എം മാണിയുടെ വേർപാടിന്റെ ഒരു വർഷം പൂർത്തിയാകുന്ന നാളെ കേരളത്തിലുടനീളം പാർട്ടി പ്രവർത്തകർ ജീവകാരുണ്യപ്രവർത്തനങ്ങളിൽ പങ്കാളികളാകുമെന്ന് റോഷി അഗസ്റ്റിൻ എം.എൽ.എ അറിയിച്ചു. കൊവിഡിന്റെ പ്രത്യേക പശ്ചാത്തലത്തിൽ കോട്ടയത്ത് ലക്ഷം പേർ പങ്കെടുത്ത് നടത്താനിരുന്ന കെ.എം മാണി സ്മൃതി സംഗമവും, മറ്റ് അനുസ്മരണ ചടങ്ങുകളും മാറ്റിവച്ചിരുന്നു. പഞ്ചായത്ത് തലത്തിലെ കമ്മ്യൂണിറ്റി കിച്ചണുകളിൽ അന്നേദിവസം സാധനങ്ങളോ, സംഭാവനയോ നൽകി പ്രവർത്തകർ സഹകരിക്കും. കേരള കോൺഗ്രസ് (എം) നേതൃത്വം നൽകുന്ന സഹകരണ സ്ഥാപനങ്ങളുടെ നേതൃത്വത്തിൽ നിരാലംബരായ കിടപ്പുരോഗികൾക്ക് 1000 രൂപ വീതം അടിയന്തിര സഹായം നൽകും. നാളെ പാലാ സെന്റ് തോമസ് കത്തീഡ്രലിൽ നടക്കുന്ന പ്രാർത്ഥനയിൽ കുടുംബാംഗങ്ങൾ മാത്രം പങ്കെടുക്കും.