കോട്ടയം : കൊവിഡ് പശ്ചാത്തലത്തിൽ വിവിധ ഗൾഫ് രാജ്യങ്ങളിലെ പ്രവാസി ഇന്ത്യാക്കാരുടെ സുരക്ഷ ഉറപ്പുവരുത്താൻ കേന്ദ്രവിദേശകാര്യവകുപ്പ് അടിയന്തിരമായി ഇടപെടണമെന്ന് കേരള കോൺഗ്രസ് (എം) ചെയർമാൻ ജോസ് കെ.മാണി എം.പി ആവശ്യപ്പെട്ടു. ആശങ്കാജനകമായ സാഹചര്യമാണ് നിലനിൽക്കുന്നത് എന്നാണ് പ്രവാസികൾ അറിയിക്കുന്നത്. സാധാരണ തൊഴിലാളികൾ തിങ്ങിപ്പാർക്കുന്ന മേഖലകളിലും ലേബർക്യാമ്പുകളിലും മതിയായ പ്രതിരോധ സംവിധാനങ്ങളോ സുരക്ഷാമുൻകരുതലുകളോ ലഭ്യമല്ല. ഭക്ഷണത്തിനും മറ്റുമായി വളരെ ബുദ്ധിമുട്ടുകയാണ്. ഓരോ പ്രവാസിയുടേയും ജീവനും ആരോഗ്യവും രാജ്യത്തെ സംബന്ധിച്ച് വിലപ്പെട്ടതാണ്. അന്താരാഷ്ട്ര വിമാന സർവീസുകൾ ഇല്ലാത്തതിനാൽ ഇവർക്കാർക്കും ഇന്ത്യയിലേക്ക് എത്തിച്ചേരാനുള്ള സാഹചര്യവും നിലവിൽ ഇല്ല. മലയാളികൾ ഉൾപ്പടെയുള്ള ഗൾഫിലെ പ്രവാസി സമൂഹത്തിന്റെ സുരക്ഷ ഉറപ്പുവരുത്താൻ കേന്ദ്രസർക്കാർ ആവശ്യമായ എല്ലാ ഇടപെടലുകളും നടത്തണമെന്നും അദ്ദേഹം ആവശ്യപ്പെട്ടു.