കാഞ്ഞിരപ്പള്ളി: ഈസ്റ്റർ ദിനത്തിൽ സ്‌നേഹസദ്യ വിളമ്പി കാഞ്ഞിരപ്പള്ളി ഗ്രാമപഞ്ചായത്ത്. സമൂഹ അടുക്കളയിലൂടെയാണ് മൂന്നുറോളം പേർക്ക് ഈസ്റ്റർ ദിനത്തിൽ കോഴി ബിരിയാണി നൽകിയത്.അഗതികൾ, കിടപ്പ് രോഗികൾ, തെരുവുകളിൽ ജീവിക്കുന്നവർ, ഒറ്റപ്പെട്ട് കഴിയുന്നവർ, അന്യസംസ്ഥാന തൊഴിലാളികൾ എന്നിവർക്ക് സൗജന്യമായും, കച്ചവടക്കാരും, വഴിയാത്രക്കാരുമുൾപ്പെടെയുള്ളവർക്ക് ഇരുപത് രൂപ നിരക്കിലുമാണ് കോഴി ബിരിയാണി നൽകിയത്.പൊലീസിനും ഫയർഫോഴ്‌സ് ഉദ്യോഗസ്ഥർക്കും സ്‌നേഹസമ്മാനമായി ബിരിയാണി പൊതികൾ നൽകി. മുൻ മന്ത്രി കെ.എം.മാണിയുടെ ചരമവാർഷിക ദിനത്തിന്റെ ഭാഗമായി കേരളാ യൂത്ത് ഫ്രണ്ട് (എം) പ്രവർത്തകർ നൽകിയ അരിയും, അനുബന്ധ സാധനങ്ങളും, കോഴിഫാം ഉടമകൾ സംഭാവനയായി നൽകിയ കോഴിയുമെല്ലാം ചേർത്ത് രുചികരമായ ബിരിയാണി പാകം ചെയ്തത് കുടുംബശ്രീ പ്രവർത്തകരാണ്. പഞ്ചായത്ത് പ്രസിഡന്റ് ,അംഗങ്ങൾ, കുടുംബശ്രീ സി.ഡി.എസ് പ്രവർത്തകർ എന്നിവരുടെ നേതൃത്വത്തിലായിരുന്നു ഭക്ഷണ വിതരണം. മാർച്ച് 28ന് ആരംഭിച്ച സമൂഹ അടുക്കളയിലൂടെ ഇതു വരെ 2973 ഭക്ഷണ പൊതികളാണ് വിതരണം ചെയ്തത്.