കോട്ടയം: സാങ്കേതിക പ്രശ്‌നങ്ങൾ പരിഹരിച്ചാൽ 16 മുതൽ ജില്ലയിലെ വർക്ക്‌ ഷോപ്പുകൾ തുറക്കുമെന്ന് അസോസിയേഷൻ ഒഫ് ഓട്ടോമൊബൈൽ വർക്ക്‌ഷോപ്പ്‌സ് കേരള ജില്ലാ കമ്മിറ്റി അറിയിച്ചു. വ്യാഴാഴ്ചയും ഞായറാഴ്ചയും വർക്ക്‌ഷോപ്പുകൾ തുറന്നു പ്രവർത്തിക്കുന്നതിനാണ് സംസ്ഥാന സർക്കാർ അനുവാദം നൽകിയിരിക്കുന്നത്. എന്നാൽ, മിക്ക കേടുപാടുകൾക്കും ലെയ്ത്ത്, വെൽഡിംഗ് വർക്ക്‌ഷോപ്പ്, ഇലക്ട്രിക്കൽ വർക്ക്‌ഷോപ്പ് എന്നിവയെ ആശ്രയിക്കേണ്ടി വരാറുണ്ട്. ഈ സാഹചര്യത്തിൽ അടുത്തടുത്ത ദിവസങ്ങളിൽ തുറക്കുന്നതിനുള്ള അനുമതി നൽകിയെങ്കിൽ മാത്രമേ ജോലികൾ പൂർത്തിയാക്കാൻ സാധിക്കൂ . രോഗപ്രതിരോധ പ്രവർത്തനങ്ങളുമായി ബന്ധപ്പെട്ട് സർവീസ് നടത്തുന്ന വാഹനങ്ങൾക്ക് സൗജന്യ സേവനം നൽകുന്നുണ്ടെന്നും ഭാരവാഹികൾ അറിയിച്ചു.