* ഡയാലിസിസ് യൂണിറ്റിന് 15 ലക്ഷം * ഫയർ ആന്റ് സേഫ്റ്റി റൂം നിർമ്മിക്കാൻ 5 ലക്ഷം * റോഡ് നവീകരിക്കാൻ 25 ലക്ഷം

പാലാ: പാലാ ജനറൽ ആശുപത്രിയിൽ അടിയന്തിര നവീകരണ പ്രവർത്തനങ്ങൾക്കുവേണ്ടി എം.എൽ.എ ഫണ്ടിൽ നിന്നും 45 ലക്ഷം രൂപ അനുവദിച്ചതായി മാണി.സി.കാപ്പൻ എം.എൽ.എ അറിയിച്ചു. ജനറൽ ആശുപത്രിക്കു സർക്കാർ പുതുതായി പത്ത് ഡയാലിസിസ് യൂണിറ്റുകൾ അനുവദിച്ചിരുന്നു. കഴിഞ്ഞ ഫെബ്രുവരിയിൽ പാലായിൽ എത്തിച്ച ഈ യൂണിറ്റുകൾ പ്രവർത്തനക്ഷമമാക്കുന്നതിനാണ് 15 ലക്ഷം രൂപ വകയിരുത്തിയിരിക്കുന്നത്.

ജനറൽ ആശുപത്രിക്കു ബഹുനില മന്ദിരം നിലവിലുണ്ടെങ്കിലും നിബന്ധനകൾ അനുസരിച്ചുള്ള ഫയർ ആന്റ് സേഫ്റ്റി റൂം സ്ഥാപിച്ചിരുന്നില്ല. ഇതുമൂലം പല അനുമതികൾക്കും തടസ്സം നേരിട്ടിരുന്നു. അതിനാൽ ഫയർ ആന്റ് സേഫ്റ്റി റൂമിന്റെ നിർമ്മാണ പ്രവർത്തനങ്ങൾ അടിയന്തിരമായി പൂർത്തീകരിക്കാൻ 5 ലക്ഷം രൂപയും അനുവദിച്ചിട്ടുണ്ട്.

പുതിയ ആശുപത്രി മന്ദിരം സ്ഥാപിച്ചിട്ടും അവിടേയ്ക്കുള്ള റോഡിന് വീതിയില്ലാത്തത് ഏറെ പ്രശ്‌നങ്ങൾ സൃഷ്ടിച്ചിരുന്നു. ഇതിന്റെ അടിസ്ഥാനത്തിൽ ആരോഗ്യമന്ത്രിയുമായി എം.എൽ.എ തിരുവനന്തപുരത്ത് നടത്തിയ ചർച്ചയെത്തുടർന്ന് ആശുപത്രിയുടെ ഉടമസ്ഥതയിൽ ഉള്ള 2.75 സെന്റ് സ്ഥലം പൊതുമരാമത്ത് വകുപ്പിന് കൈമാറാൻ തീരുമാനമായി. സ്ഥലം അടിയന്തിരമായി കൈമാറാനുള്ള നടപടിക്രമങ്ങൾ പൂർത്തീകരിച്ച ഡി.എച്ച്.എസ് ഇന്നലെ സ്ഥലം കൈമാറാനുള്ള അനുമതി നൽകിയിട്ടുണ്ട്. ഇവിടെ റോഡിന് വീതികൂട്ടി ടാർ ചെയ്യുന്നതിനും സംരക്ഷണഭിത്തി കെട്ടി നവീകരിക്കുന്നതിനുമായി 25 ലക്ഷം രൂപയും എം.എൽ.എ ഫണ്ടിൽ നിന്നും അനുവദിച്ചു.

അടിയന്തിര പ്രാധാന്യം നൽകി നടപടികൾ ആരംഭിക്കാൻ ജില്ലാ കളക്ടർക്ക് നിർദ്ദേശം നൽകിയതായും മാണി.സി.കാപ്പൻ അറിയിച്ചു.

ഉടൻ പ്രവർത്തിപ്പിക്കും

പാലാ: ജനറൽ ആശുപത്രിയിലെ 10 ഡയാലിസിസ് മെഷീനുകളും പ്രവർത്തിപ്പിക്കുന്നതിനുള്ള നടപടി ആരോഗ്യ വകുപ്പ് ആരംഭിച്ചതായി ജോസ്. കെ. മാണി എം.പി.

കഴിഞ്ഞദിവസം ആശുപത്രി സന്ദർശിച്ച ജോസ്.കെ.മാണി ഡയാലിസിസ് മെഷീനുകൾ രോഗികൾക്ക് പ്രയോജനപ്പെടുത്താൻ നടപടി സ്വീകരിക്കണമെന്ന് ആവശ്യപ്പെട്ടിരുന്നു. ഇതേ തുടർന്ന് ആരോഗ്യ വകുപ്പ് ഉന്നതാധികാരികൾ ജനറൽ ആശുപത്രി സൂപ്രണ്ടിൽ നിന്നും റിപ്പോർട്ട് വാങ്ങുകയും മെഷീനുകൾ സ്ഥാപിക്കാൻ നടപടി സ്വീകരിക്കുകയുമായിരുന്നു. ഡയാലിസിസ് ഉപകരണം നൽകിയ കമ്പനി അധികൃതർ ഇന്നലെ ആശുപത്രിയിലെത്തി സ്ഥല നിർണ്ണയം നടത്തുകയും ഉപകരണം സ്ഥാപിച്ച് പ്രവർത്തിപ്പിക്കുവാൻ ആവശ്യമായ ക്രമീകരണങ്ങൾ ഉടൻ സജ്ജീകരിക്കുമെന്ന് അറിയിക്കുകയുമായിരുന്നു.