ന്യൂയോർക്ക്: കൊറോണ ബാധിച്ച് ന്യൂയോർക്കിലും ന്യൂജഴ്സിയിലുമായി രണ്ട് മലയാളികൾ മരിച്ചു. പത്തനംതിട്ട ഇലന്തൂർ സ്വദേശി തോമസ് ഡേവിഡ്‌ എന്ന (43) ന്യൂയോർക്കിൽ മരിച്ചത്. ന്യൂയോർക്ക് മെട്രോപൊളിറ്റൻ ട്രാൻസ്‌പോർട്ട് അതോറിറ്റിയിൽ ജീവനക്കാരനായിരുന്നു. എറണാകുളം രാമപുരം സ്വദേശി കുഞ്ഞമ്മ സാമുവലാണ് ന്യൂജഴ്സിയിൽ മരിച്ചത്. ആശുപത്രിയിൽ ചികിത്സയിലിരിക്കെയാണ് കുഞ്ഞമ്മയ്ക്ക് രോഗം ബാധിച്ചത്.

അമേരിക്കയിൽ കൊറോണ ബാധിച്ച് മരിച്ചവരുടെ എണ്ണം 3800 ആയി ഉയർന്നു. രോഗബാധിതരുടെ എണ്ണം 1,64,359 ആയി. ന്യൂയോർക്കിൽ മാത്രം മരണസംഖ്യ 1200 കടന്നു. അരലക്ഷത്തിലേറെ പേർക്കാണ് ന്യൂയോർക്കിൽ രോഗം സ്ഥിരീകരിച്ചത്. ആശുപത്രികളെല്ലാം നിറഞ്ഞു. ആവശ്യത്തിന് മെഡിക്കൽ ജീവനക്കാരില്ലാത്തതും വെന്റിലേറ്റർ ഉൾപ്പെടെയുള്ള സൗകര്യങ്ങളില്ലാത്തതും പ്രതിസന്ധിയുയർത്തുന്നുണ്ട്.