തിരുവനന്തപുരം: കോവിഡ് 19 പ്രതിരോധ പ്രവർത്തനത്തിനായി മുഖ്യമന്ത്രിയുടെ ദുരിതാശ്വാസ ഫണ്ടിലേക്ക് കേരള ക്രിക്കറ്റ്‌ അസോസിയേഷൻ 50 ലക്ഷം രൂപ നൽകും. കേന്ദ്ര സർക്കാരിന് നൽകിയ 50 ലക്ഷത്തിന് പുറമെയാണിത്. ബി.സി.സി.ഐ ജോയിന്റ് സെക്രട്ടറി ജയേഷ് ജോർജ്, കേരള ക്രിക്കറ്റ്‌ അസോസിയേഷൻ ഭാരവാഹികൾ, ജില്ലാ ക്രിക്കറ്റ്‌ അസോസിയേഷൻ സെക്രട്ടറിമാരും കൂടി ചേർന്ന് നടത്തിയ ചർച്ചയിലാണ് തീരുമാനം എടുത്തത്. ജില്ലാ ക്രിക്കറ്റ്‌ അസോസിയേഷൻ ഓരോ ലക്ഷം രൂപ വീതം നൽകും, കൂടാതെ ക്രിക്കറ്റ് കളിക്കാർ, മുൻ താരങ്ങൾ, ഒഫീഷ്യലുകൾ, ഉദ്യോഗസ്ഥർ ക്രിക്കറ്റ് അസോസിയേഷനുമായി സഹകരിക്കുന്നവർ എന്നിവരിൽ നിന്നും സഹായം തേടും. പ്രളയകാലത്ത് കെ.സി.എ 65 ലക്ഷം രൂപ സർക്കാരിന് നൽകിയിരുന്നു.