തിരുവനന്തപുരം: കൊവിഡ്-19 പ്രതിരോധ നടപടികളുടെ ഭാഗമായി സെക്രട്ടേറിയറ്റിൽ ആരംഭിച്ച വാർ റൂമിന്റെ പ്രവർത്തനം മൂന്ന് ഷിഫ്റ്റുകളിലായി 24 മണിക്കൂറും ആക്കിക്കൊണ്ട് പൊതുഭരണ വകുപ്പ് ഉത്തരവായി. രാവിലെ 7 മുതൽ ഉച്ചയ്ക്ക് 2 വരെ ഒന്നാം ഷിഫ്റ്റും ഉച്ചയ്ക്ക് 2 മുതൽ രാത്രി 8 വരെ രണ്ടാം ഷിഫ്റ്റും രാത്രി 8 മുതൽ പിറ്റേന്ന് രാവിലെ 7 വരെ മൂന്നാം ഷിഫ്റ്റുമാണ്. ഐ.എ.എസുകാരായ ഡോ.എ. കൗശിഗൻ, ഡോ.എസ്. കാർത്തികേയൻ, വി.ആർ. പ്രേംകുമാർ, ജെറോമിക് ജോർജ് എന്നിവർക്ക് കൂടി വാർറൂമിന്റെ മേൽനോട്ട ചുമതലകൾ നൽകി. ഷിഫ്റ്റടിസ്ഥാനത്തിൽ മൂന്ന് ഗ്രൂപ്പുകളായി ജീവനക്കാരെ തരംതിരിച്ച് ക്രമീകരിക്കേണ്ടത് ചുമതലക്കാരായ ഉന്നതോദ്യോഗസ്ഥരാണ്.
ഇതിന് പുറമേ, സർക്കാർ പ്രഖ്യാപിച്ച ആനുകൂല്യങ്ങൾ ഉപഭോക്താക്കളുടെ കൈകളിൽ തടസ്സമില്ലാതെയെത്തുന്നുവെന്ന് വിലയിരുത്തി ഉറപ്പാക്കാനുള്ള ചുമതല ഐ.എ.എസ് ഉദ്യോഗസ്ഥയായ ജോഷി മൃണ്മയി ശശാങ്കിന് നൽകി. എല്ലാ ജില്ലകളിലും ഭക്ഷ്യധാന്യങ്ങളുടെ ലഭ്യത സംബന്ധിച്ച് ദൈനംദിന റിപ്പോർട്ട് ലഭ്യമാക്കൽ, റേഷൻ പൊതുവിതരണവുമായി ബന്ധപ്പെട്ടുയർന്നു വരുന്ന പരാതികൾ സമയബന്ധിതമായി തീർപ്പാക്കലിനുള്ള ഇടപെടൽ എന്നിവയുടെ ചുമതല മറ്റൊരു ഐ.എ.എസുകാരനായ നരസിംഹുഗാരി തേജ് ലോഹിത് റെഡ്ഢിക്ക് നൽകി. തൊഴിൽവകുപ്പിന്റെ പ്രതിനിധികളെ കൂടി വാർറൂമിന്റെ ഭാഗമാക്കാൻ ലേബർ കമ്മിഷണർക്കും നിർദ്ദേശം നൽകിയിട്ടുണ്ട്.
വാർറൂം ഗ്രൂപ്പുകൾ ഈ വകുപ്പുകളിൽ നിന്ന്:
- ആരോഗ്യ, കുടുംബക്ഷേമ വകുപ്പ്, റവന്യു, തദ്ദേശസ്വയംഭരണം, ഭക്ഷ്യവും പൊതുവിതരണവും, ഗതാഗതം, പൊലീസ്, തൊഴിലും നൈപുണ്യവും.
ഓരോ ഗ്രൂപ്പിലും ഒരു സമയം രണ്ട് പേർ മാത്രം.
കാര്യനിർവഹണ സഹായത്തിന് ചുമതലപ്പെടുത്തുന്ന ജീവനക്കാർ പരമാവധി മൂന്ന് പേർ.
സമയ ക്ലിപ്തത നിർബന്ധം. അടുത്ത ഷിഫ്റ്റിലുള്ളവർ എത്തിയിട്ടേ മുൻ ഷിഫ്റ്റുകാർ മടങ്ങാവൂ.
ജീവനക്കാർ കൊവിഡ്-19 പ്രോട്ടോകോൾ പാലിക്കണം (ബ്രേക്ക് ദ ചെയിൻ)
ഓരോ മണിക്കൂറിലും ഫോൺ അണുനാശിനി കൊണ്ട് ശുചീകരിക്കണം.
പ്രധാന ഫോണിലേക്ക് വരുന്ന പരാതികളും അന്വേഷണങ്ങളും ഏഴക്ക ഡിജിറ്റ് ഉപയോഗിച്ച് ജി.എ.ഡി ഗ്രൂപ്പ് രജിസ്റ്റർ ചെയ്യണം. ആദ്യ രണ്ടക്കം തീയതി, രണ്ടാമത്തെ രണ്ടക്കം മാസം, മൂന്നാമത്തെ മൂന്നക്കം ഓരോ ദിവസത്തെയും ക്രമനമ്പർ.
ഫോണിലൂടെ നൽകേണ്ട പ്രാഥമികവിവരങ്ങൾ അതത് ഗ്രൂപ്പുകാർ കരുതണം.
ഒരേ സമയം രണ്ട് ഐ.എ.എസ് ഉദ്യോഗസ്ഥരുണ്ടാവണം.
ഗ്രൂപ്പംഗങ്ങൾക്ക് പരിഹരിക്കാനാവാത്തവയിൽ തുടർനടപടി ഐ.എ.എസുകാർ നിർദ്ദേശിക്കണം.
മുഖ്യമന്ത്രിയുടെയും ചീഫ്സെക്രട്ടറിയുടെയും യോഗങ്ങളിലെടുക്കുന്ന പൊതുതീരുമാനങ്ങളിൽ വാർറൂമിനെ ചുമതലപ്പെടുത്തിയവയുണ്ടെങ്കിൽ ഐ.എ.എസ് ഉദ്യോഗസ്ഥർ നേരിട്ട് കൈകാര്യം ചെയ്ത് വാർറൂം ഹെഡിനെ അറിയിക്കണം.
സാധാരണ വരുന്നതും വരാവുന്നതുമായ പട്ടിക തയാറാക്കി തുടർപ്രവർത്തനങ്ങൾക്ക് ഉപയുക്തമാകും വിധം ക്രോഡീകരിക്കാൻ ഒരു അണ്ടർസെക്രട്ടറി.
വാർറൂമും പരിസരവും വൃത്തിയായി സൂക്ഷിക്കാൻ പൊതുഭരണ ഹൗസ് കീപ്പിംഗ് സെൽ ശ്രദ്ധിക്കണം.
ജീവനക്കാർ ഹാജർകൃത്യത ഉറപ്പാക്കണം.
രാത്രി ഷിഫ്റ്റിൽ വരുന്നവർ അടുത്ത പകലും രാത്രിയും കഴിഞ്ഞ് അടുത്തദിവസം രാവിലത്തെ ഷിഫ്റ്റിലെത്തണം. രാവിലെ വരുന്നവർ അടുത്ത ദിവസം രണ്ടാം ഷിഫ്റ്റിലും രണ്ടാം ഷിഫ്റ്റിലുള്ളവർ അടുത്ത ദിവസം രാത്രിയിലുമെത്തണം.
ഓരോ വകുപ്പും വാർറൂമിലേക്ക് ജീവനക്കാരെ റിസർവിൽ കരുതണം.