മുംബയ്: മുംബയിലെ വീടിനോട് ചേർന്നുള്ള നാലുനില ഓഫീസ് കെട്ടിടം ക്വാറന്റൈനിൽ കഴിയുന്നവരെ പാർപ്പിക്കാൻ വിട്ടുകൊടുത്ത്​ ബോളിവുഡ്​ നടൻ ഷാരൂഖ്​ ഖാനും ഭാ​ര്യ ഗൗരിയും. ഇരുവരുടെയും പേഴ്​സണൽ ഓഫീസാണിത്.

കുട്ടികൾക്കും സ്​ത്രീകൾക്കും വയോധികർക്കും താമസിക്കാനുള്ള സൗകര്യങ്ങൾ ഇവിടെ ഒരുക്കിയിട്ടുണ്ട്. ഷാരൂഖിനും ഭാര്യയ്ക്കും നന്ദി അറിയിച്ച്​ ബ്രിഹാൻ മുംബയ് മുനിസിപ്പൽ കോർപറേഷൻ ട്വീറ്റ്​ ചെയ്​തു. ഷാരൂഖ്​ ഖാന്റെ നിർമ്മാണ കമ്പനിയായ റെഡ്​ ചില്ലീസ്​ എന്റർടെയിൻമെന്റ് ഇത് റീട്വീറ്റ്​ ചെയ്തു. നിമിഷങ്ങൾക്കകം SRKOfficeForQuarantine ഹാഷ്​ടാഗ്​​ ട്വിറ്ററിൽ ട്രെൻഡിംഗായി.

കൊവിഡ്​ ബാധ രാജ്യത്ത്​ പടർന്നുപിടിച്ചപ്പോൾ തന്നെ കേന്ദ്ര സർക്കാരിന്റെയും മഹാരാഷ്​ട്ര സർക്കാരിന്റെയും വിവിധ ദുരിതാശ്വാസ നിധികളിലേക്ക്​ ഷാരൂഖ്​ ഖാൻ സംഭാവന നൽകിയിരുന്നു. കൂടാതെ മഹാരാഷ്​ട്ര, പശ്ചിമബംഗാൾ സർക്കാരുകൾക്ക്​ 50,000 പി.പി.ഇ കിറ്റുകൾ സംഭാവന ചെയ്യുകയും ഭക്ഷണവിതരണം നടത്തുകയും ചെയ്തിരുന്നു. ഇതോടെ കൊവിഡ് സഹായഹസ്തവുമായി ബോളിവുഡ് ഒന്നാകെ രംഗത്തിറങ്ങിയിരിക്കുകയാണ്.