ആ​ത്മാ​ഭി​മാ​ന​ത്തെ പ​ട​വാ​ളാ​ക്കാനും അ​വ​കാ​ശ​ സ​മ​ര​ങ്ങ​ളു​ടെ പടക്ക​ള​ത്തിൽ പോ​രി​നി​റ​ങ്ങാനും പാർ​ശ്വ​വ​ത്ക​രി​ക്ക​പ്പെ​ട്ട ജ​ന​വി​ഭാ​ഗങ്ങളെ സജ്ജരാക്കിയ സം​ഘാ​ട​കനായിരുന്നു കഴിഞ്ഞ ദിവസം അന്തരിച്ച ടി വി ബാ​ബു. പിന്നിട്ട ക​റു​ത്ത​ കാ​ല​ഘ​ട്ട​ത്തിൽ ത​ന്റെ ത​ല​മു​റ അ​നു​ഭ​വി​ച്ച അ​വ​ഗ​ണ​ന​യു​ടെ ക​യ്പു​നീർ, ഇ​നി​യൊ​രു ത​ല​മു​റ കൂ​ടി അ​നു​ഭ​വി​ക്ക​രു​തെ​ന്നു ചി​ന്തി​ക്കു​ക​യും അ​തി​ന​നു​സ​രി​ച്ചു പ്ര​വർ​ത്തി​ക്കു​ക​യും ചെ​യ്ത മ​നു​ഷ്യ​സ്‌നേ​ഹി.

ബി.ഡി.ജെ.എസ് എ​ന്ന രാ​ഷ്ട്രീ​യ പ്ര​സ്ഥാ​ന​ത്തി​ന്റെ പി​റ​വി മു​തൽ അ​ടി​സ്ഥാ​ന ജ​ന​വി​ഭാ​ഗ​ങ്ങ​ളു​ടെ ഉ​യർ​ച്ച മാ​ത്രം ല​ക്ഷ്യംവച്ച് രാ​പ​ക​ലി​ല്ലാ​തെ ഒപ്പം പ്ര​വർ​ത്തി​ച്ച ജ്യേഷ്ഠ ​സ​ഹോ​ദ​ര​ന്റെ വേർ​പാ​ട് നൽകുന്ന നൊ​മ്പ​രം വാ​ക്കു​ക​ളിൽ ഒതുക്കാനാകുന്നില്ല. മ​ഹാ​ത്മാ അ​യ്യ​ങ്കാ​ളിക്കു ശേ​ഷം അ​ധഃ​സ്ഥി​ത വി​ഭാ​ഗ​ത്തെ സം​ഘ​ടി​പ്പി​ക്കാൻ വ​ലി​യ പ​ങ്കു​വ​ഹി​ച്ച കേ​ര​ള പു​ല​യർ മ​ഹാ​സ​ഭയിലൂടെയാണ് (കെ​.പി.എം.എസ്) ടി.വി. ബാ​ബു പൊ​തു​രം​ഗ​ത്ത് സ​ജീ​വ​മാ​യ​ത്.

പ​ട്ട​യ​ഭൂ​മി സം​ര​ക്ഷ​ണ സ​മി​തി​യു​ടെ ജ​ന​റൽ കൺ​വീ​നർ ആ​യി സ​മ​ര​മു​ഖ​ത്തെ​ത്തി​യ അ​ദ്ദേ​ഹം അ​വ​കാ​ശ സ​മ​ര​മു​ഖ​ത്ത് അ​ടി​പ​ത​റാ​തെ നി​ന്ന് ധീ​ര​മാ​യി ജ​ന​ങ്ങ​ളെ ന​യി​ച്ചു. സാ​മൂ​ഹ്യ സ​മ​ത്വ മു​ന്ന​ണി എ​ന്ന പേ​രിൽ പ​ട്ടി​ക​ജാ​തി സം​ഘ​ട​ന​ക​ളു​ടെ ഏ​കോ​പ​ന​മു​ണ്ടാ​ക്കി ശ​ക്തി​തെ​ളി​യി​ച്ചതിനു പിന്നിൽ ബാ​ബു​വി​ന്റെ സം​ഘാ​ടക മി​ക​വ് ഉ​ണ്ടാ​യി​രു​ന്നു. മ​ത​പ​രി​വർ​ത്ത​നം ചെ​യ്ത​വരെക്കൂടി പ​ട്ടി​ക​ജാ​തി ലി​സ്റ്റിൽ ഉൾ​പ്പെ​ടു​ത്താ​നു​ള്ള നീ​ക്ക​ത്തി​നെ​തി​രെ വ​ലി​യ പ്രക്ഷോഭം നയിക്കാൻ അദ്ദേഹത്തിനു ക​ഴി​ഞ്ഞു.ശ​ബ​രി​മ​ല കർ​മ്മസ​മി​തി​യു​ടെ ആ​ഭി​മു​ഖ്യ​ത്തിൽ ന​ട​ന്ന ഭ​ക്ത​ജ​ന പ്ര​ക്ഷോ​ഭ​ങ്ങ​ളി​ലും ബാബു സ​ജീ​വ​മാ​യി​രു​ന്നു.

ഇ​ട​തു​പ​ക്ഷ രാ​ഷ്ട്രീ​യ​ത്തിൽ വി​ശ്വ​സി​ക്കു​ക​യും സി.പി.ഐ സ്ഥാ​നാർ​ഥി​യാ​യി തി​ര​ഞ്ഞെ​ടു​പ്പിൽ മ​ത്സ​രി​ക്കു​ക​യും ചെ​യ്തി​ട്ടു​ള്ള ബാ​ബു, അ​തു​പേ​ക്ഷി​ച്ചാ​ണ് ബി.ഡി.ജെ.എസ് രൂ​പീ​ക​ര​ണ​ത്തിൽ പ​ങ്കാ​ളി​യാ​യ​ത്. കേ​ര​ള​ത്തി​ലെ പി​ന്നാ​ക്ക സ​മു​ദാ​യ​ക്കാ​രു​ടെ ഐ​ക്യ​നി​ര​യ്ക്ക് നേ​തൃ​പ​ര​മാ​യ പ​ങ്കു വ​ഹി​ക്കേ​ണ്ട​ണ്ട ചു​മ​ത​ല എ​സ്.എൻ.ഡി.പി യോ​ഗ​ത്തി​നാ​ണെ​ന്ന് ഉ​റ​ച്ചുവി​ശ്വ​സി​ച്ചി​രു​ന്ന പൊ​തു പ്ര​വർ​ത്ത​ക​നാ​ണ് ബാ​ബു. യോ​ഗം ജ​ന​റൽ സെ​ക്ര​ട്ട​റി വെ​ള്ളാ​പ്പ​ള്ളി ന​ടേ​ശൻ ന​യി​ച്ച സ​മ​ത്വ മു​ന്നേ​റ്റ ജാ​ഥ​യിൽ ആ​ദ്യ​വ​സാ​നം പ​ങ്കെ​ടു​ത്ത ബാബു ജാ​ഥ​യു​ടെ സ​മാ​പ​ന​ത്തിൽ ബി​.ഡി.ജെ.എസ് രൂ​പീ​ക​രി​ച്ച​പ്പോൾ സ്ഥാ​പ​ക ജ​ന​റൽ സെ​ക്ര​ട്ട​റി​യായി. പാർട്ടി സ്ഥാനാർത്ഥിയായി ആദ്യം നാ​ട്ടി​ക​യിൽ നി​ന്ന് നി​യ​മ​സ​ഭ​യി​ലേ​ക്കും പി​ന്നീ​ട് ആ​ല​ത്തൂരിൽ നിന്ന് ലോ​ക് സ​ഭ​യി​ലേ​ക്കും ജ​ന​വി​ധി തേ​ടു​ക​യും ചെ​യ്തു. ബാ​ബു​വി​ന്റെ വാ​ഗ്മി​ത്വ​വും സം​ഘാടന മി​ക​വും ബി.ഡി.ജെ.എസിന്റെ ആശയങ്ങൾ ജ​ന​ങ്ങ​ളി​ലെ​ത്തി​ക്കു​ന്ന​തി​ന് ഏ​റെ സ​ഹാ​യ​ക​മാ​യി. സൗ​മ്യ​വും ദീ​പ്ത​വു​മാ​യി​രു​ന്നു ആ നി​റ​സാ​ന്നിദ്ധ്യം.

കേ​ര​ള​ത്തിൽ, അധ:സ്ഥിത ജനവിഭാഗങ്ങളെ സാമൂഹ്യമായി ശാക്തീകരിക്കുന്നതിൽ ടി.വി. ബാബിന്റെ പ്രവർത്തനം ശ്രദ്ധേയമാണെന്ന് പ്രധാനമന്ത്രി നരേന്ദ്രമോദി അദ്ദേഹത്തിന്റെ അനുശോചന സന്ദേശത്തിൽ പറഞ്ഞത് കേരളത്തിലെ സാ​ധാ​ര​ണ​ക്കാ​ര​നാ​യ പൊ​തു​പ്ര​വർ​ത്ത​ക​നു ല​ഭി​ച്ച അം​ഗീ​കാ​ര​മാ​യി കരുതാം. ടി.വി. ബാബുവിന്റെ കുടുംബാംഗങ്ങളുടെ ദുഃ​ഖ​ത്തിൽ പ​ങ്കു ചേ​രു​ന്നു​തി​നൊ​പ്പം അ​വ​രു​ടെ മുന്നോട്ടുള്ള ജീ​വി​ത​ത്തിൽ എ​ല്ലാ സ​ഹാ​യ​വും നൽ​കാൻ ബി.ഡി.ജെ.എസ് പ്ര​വർ​ത്ത​കർ ഉ​ണ്ടാ​കു​മെ​ന്ന് ഉ​റ​പ്പു നൽ​കു​ക​യാ​ണ്