പാട്​ന: ബിഹാറിലെ 60 കൊവിഡ് -19 കേസുകളിൽ 23 ഉം സിവാൻ ജില്ലയിലെ ഒരു കുടുംബത്തിലുള്ളവർക്ക്. സംസ്ഥാനത്തെ ഏറ്റവും വലിയ കോവിഡ്​ ക്ലസ്റ്ററാണിത്​.

കഴിഞ്ഞ മാസം ഒമാനിൽ നിന്ന് മടങ്ങിയെത്തിയ ഒരാളിൽ നിന്നാണ് രോഗ ശൃംഖല ആരംഭിച്ചത്.

മാർച്ച് 16ന് ഒമാനിൽ നിന്ന്​ തിരിച്ചെത്തിയയാൾക്ക് ഏപ്രിൽ നാലിനാണ്​ കൊവിഡ് സ്ഥിരീകരിച്ചത്​. ഇയാളുടെ കുടുംബത്തിലെ കുട്ടികളും സ്​ത്രീകളും ഉൾപ്പെടെ 22 പേർ രോഗബാധിതരായി. ഇവരിൽ പലർക്കും കൊവിഡ്​ ലക്ഷണങ്ങളുണ്ടായിരുന്നില്ല. വിദേശത്ത്​ നിന്നെത്തിയയാൾ ഉൾപ്പെടെ നാലുപേർ സുഖം പ്രാപിച്ചതായി ആരോഗ്യവകുപ്പ്​ അധികൃതർ അറിയിച്ചു.

രോഗിയെയും സമ്പർക്കത്തിലിരുന്നവരെയും കണ്ടെത്താൻ കഴിഞ്ഞത്​ വൈറസ്​ വ്യാപനമുണ്ടാകാതെ തടയാൻ സഹായിച്ചുവെന്ന്​ പ്രിൻസിപ്പൽ ഹെൽത്ത് സെക്രട്ടറി സഞ്ജയ് കുമാർ പ്രതികരിച്ചു.