ലണ്ടൻ: ലിവർപൂൾ ഇതിഹാസ താരവും പരിശീലകനുമായിരുന്ന കെന്നി ഡാഗ്ലിഷിന് കൊവിഡ് സ്ഥിരീകരിച്ചു. ഇദ്ദേഹത്തിന് കൊവിഡിന്റേതായ യാതൊരു ലക്ഷണവും കാണിച്ചിരുന്നില്ല. കഴിഞ്ഞ ദിവസം ആശുപത്രിയിൽ എത്തിയ കെന്നിയെ കൊവിഡ് ടെസ്റ്റിനും വിധേയമാക്കിയിരുന്നു. ഈ പരിശോധനയിലാണ് രോഗബാധയുണ്ടെന്ന് സ്ഥിരീകരിച്ചത്.

നിലവിൽ ആശുപത്രിയിൽ ചികിത്സയിലാണ് അറുപത്തൊമ്പതുകാരനായ കെന്നി. ഇദ്ദേഹത്തിന്റെ ആരോഗ്യ നില തൃപ്തികരമാണെന്നും ഉടൻ തന്നെ ആശുപത്രി വിടാൻ കഴിയുമെന്നാണ് പ്രതീക്ഷയെന്നും കെന്നിയുടെ കുടുംബം അറിയിച്ചിട്ടുണ്ട്. ലിവർപൂളിനൊപ്പം ആറ് ഇംഗ്ലീഷ് ലീഗ് കിരീടവും മൂന്ന് യൂറോപ്യൻ കിരീടവും കെന്നി താരമെന്ന നിലയിൽ നേടിയിട്ടുണ്ട്. പരിശീലകനായും ലിവർപൂളിന് മൂന്ന് ലീഗ് കിരീടങ്ങൾ അടക്കം 11 കിരീടങ്ങൾ അദ്ദേഹം നേടിക്കൊടുത്തിട്ടുണ്ട്.