ന്യൂഡൽഹി: ഇറ്റലിയിൽ നിന്നെത്തി ഡൽഹി സൈനിക ക്യാമ്പിൽ ക്വാറന്റൈനിലായിരുന്ന മലയാളികൾ ഉൾപ്പെടെ 40 അംഗ സംഘം കേരളത്തിലേക്ക് ബസിൽ പുറപ്പെട്ടു. ഇന്ന് പുലർച്ചെ പുറപ്പെട്ട ബസ് മൂന്നാംനാൾ കേരളത്തിലെത്തും. 30 മലയാളികളുള്ള സംഘത്തിൽ ഒരു ഗർഭിണിയുമുണ്ട്. തമിഴ്നാട്ടുകാരായ 7 പേരും ബസിലുണ്ട്.

രണ്ട് തവണ പരിശോധിച്ച് കൊവിഡ് ഇല്ലെന്ന് സ്ഥിരീകരിച്ചതിനെതുടർന്നാണ് നാട്ടിലേക്ക് മടങ്ങുന്നത്. മാർച്ച് 15നും 22നും ഇറ്റലിയിലെ മിലാനിൽ നിന്നും റോമിൽ നിന്നും ഡൽഹിയിൽ എത്തിയവരാണിവർ. കേരള സർക്കാരും കേരള ഹൗസും ഇടപെട്ടാണ് ചാവ്ലയിലെ സൈനിക ക്യാമ്പിൽ കുടുങ്ങിയ ഇവരെ നാട്ടിലേക്ക് അയച്ചത്.

സംസ്ഥാനങ്ങൾ കടക്കാനുള്ള പ്രത്യേക പാസും ലഭ്യമാക്കി. അടിയന്തരാവശ്യത്തിനുള്ള ഭക്ഷണം അടക്കം കേരള ഹൗസിൽനിന്ന് ലഭ്യമാക്കിയതായി കേരള സർക്കാരിന്റെ പ്രത്യേക പ്രതിനിധി എ.സമ്പത്ത് അറിയിച്ചു. കർണാടക, മഹാരാഷ്ട്ര സ്വദേശികളേയും ഇത്തരത്തിൽ വാഹന സൗകര്യം ഏർപ്പാടാക്കി കൊണ്ടുപോയിരുന്നു.