തിരുവനന്തപുരം:കൊവിഡ് വ്യാപനത്തിന്റെ പശ്ചാത്തലത്തിൽ ആശങ്കയിൽ കഴിയുന്ന പ്രവാസി ഇന്ത്യക്കാരുടെ സുരക്ഷ ഉറപ്പാക്കുന്നതിന് നടപടി സ്വീകരിക്കണമെന്നാവശ്യപ്പെട്ട് അടൂർ പ്രകാശ് എം. പി പ്രധാനമന്ത്രിക്കും വിദേശകാര്യമന്ത്രിക്കും കത്തയച്ചു.
മലയാളികൾ ഉൾപ്പെടെ വിദേശ ഇന്ത്യക്കാരുടെ മരണം ഏറിവരുന്നതിൽ പ്രവാസി സമൂഹം കടുത്ത ആശങ്കയിലാണ്.
ലക്ഷക്കണക്കിന് ഇന്ത്യക്കാർ ജോലി ചെയ്യുന്ന ഗൾഫ് രാജ്യങ്ങളിൽ കൊവിഡ് പടരുന്നത് സർക്കാർ അതീവ ഗൗരവത്തോടെ കാണണം. ലേബർ ക്യാമ്പുകളിലും മറ്റും വളരെ പരിമിതമായ ജീവിത സാഹചര്യങ്ങളിൽ കഴിയുന്ന അവിദഗ്ദ്ധ തൊഴിൽ മേഖലയിൽ ജോലി ചെയ്യുന്ന തൊഴിലാളികളാണ് ഇവരിൽ ഏറെയും. ഇവർക്ക് ഈ രാജ്യങ്ങളിലുള്ള ചികിത്സാ സൗകര്യങ്ങൾ തികച്ചും അപര്യാപ്‌തമാണ്. ഇത്തരത്തിൽ വിവിധ രാജ്യങ്ങളിൽ കുടുങ്ങി കിടക്കുന്ന ഇന്ത്യാക്കാരെ തിരിച്ചെത്തിക്കുന്നതിന് സർക്കാർ നടപടി സ്വീകരിക്കണം.
വിദേശത്തുള്ള ഇന്ത്യക്കാർ നേരിടുന്ന മറ്റൊരു പ്രശ്നം വിസാ കാലാവധി തീരുന്നതാണ്. ഇക്കാര്യത്തിലും സർക്കാരിന്റെ ഇടപെടൽ വേണമെന്നും അടൂർ പ്രകാശ് ആവശ്യപ്പെട്ടു.