ഭോപ്പാൽ: മദ്ധ്യപ്രദേശിലെ സിൻഗ്രോലിയിലുള്ള റിയലയൻസ്​ കൽക്കരി വൈദ്യുത നിലയത്തിൽ വിഷലിപ്തമായ അവശിഷ്ടങ്ങൾ ഉൾക്കൊള്ളുന്ന കൃത്രിമ തടാകം ചോർന്ന്​ അഞ്ച്​ പേരെ കാണാതായി. തടാകത്തിൽ നിന്നു ചാരവും വെള്ളവും കുത്തിയൊലിച്ച്​ വന്നതോടെ സമീപ പ്രദേശത്തുള്ളവർ ഒഴുക്കിൽപ്പെട്ടുവെന്നാണ്​ റിപ്പോർട്ട്​. വെള്ളിയാഴ്ച വൈകിട്ടാണ് സംഭവം. 10 കൽക്കരി വൈദ്യുത നിലയങ്ങളുള്ള സിൻഗ്രോലിയിൽ ഒരു വർഷത്തിനിടെ ഉണ്ടാകുന്ന മൂന്നാമത്തെ അപകടമാണിത്​. വിഷമയമുള്ള ചെളിയിൽ പുതഞ്ഞ പ്രദേശത്തിന്റെ ചിത്രങ്ങൾ പുറത്തുവന്നിട്ടുണ്ട്​. റിലയൻസ് വൈദ്യുത നിലയത്തിന്റെ വലിയ വീഴ്ചയാണിതെന്ന്​ ജില്ലാ കളക്​ടർ കെ.വി.എസ്​ ചൗധരി പറഞ്ഞു. ഗ്രാമവാസികളെ രക്ഷപ്പെടുത്താനുള്ള ശ്രമത്തിലാണ്​. കമ്പനിയിൽ നിന്ന്​ നഷ്ടപരിഹാരം ഈടാക്കുമെന്നും കളക്​ടർ പറഞ്ഞു. കഴിഞ്ഞ വർഷം ഇതേ മേഖലയിൽ പ്രവർത്തിക്കുന്ന എസ്സർ പ്ലാന്റിലെ കൃത്രിമ കുളത്തിൽ നിന്ന് വിഷമയമായ വെള്ളം ചോർന്നിരുന്നു. മാസങ്ങൾക്ക് മുമ്പ്​ റിലയൻസിലെ വിഷജലത്തി​ന്റെയും ചാരത്തി​ന്റെയും ചോർച്ചയെ തുടർന്ന്​ പ്രദേശവാസികൾ പ്രതിഷേധവുമായി രംഗത്തിറങ്ങിയിരുന്നു. തുടർന്ന്​ പ്രദേശം ദേശീയ ഹരിത ട്രൈബ്യൂണൽ സന്ദർശിക്കുകയും കൃ​ത്രിമ തടാകവും മാലിന്യങ്ങളും കൃത്യമായി പരിപാലിക്കണമെന്ന് നിർദ്ദേശിക്കുകയും ചെയ്തിരുന്നു.