കൊവിഡിൽ കേരളം നടത്തുന്ന പ്രതിരോധപ്രവർത്തനങ്ങൾക്ക് പ്രമുഖ അമേരിക്കൻ പത്രം വാഷിംഗ്ടൺ പോസ്റ്റിന്റെ പ്രശംസ.-" വൈറസ് ബാധയറിയാൻ കർശനമായ പരിശോധന,രോഗബാധിതരുടെ സമ്പർക്കം കണ്ടെത്തൽ, സുര​ക്ഷി​ത​മായ ലോക്ക്ഡൗൺ, രോഗം ഭേദ​മാ​യ​വ​രുടെ എണ്ണം,കമ്മ്യൂണിറ്റി കിച്ചണിലുടെ ലക്ഷക്കണക്കിനുപേർക്ക് സൗജന്യഭക്ഷണം, " -കേരളം എന്ന സംസ്ഥാനം കൊവിഡ് പ്രതിരോധത്തിൽ സ്വീകരിച്ച നടപടികൾ ലോകത്തിന് തന്നെ മാതൃകയാണെന്നാണ് വാഷിംഗ്ടൺ പോസ്റ്റിന്റെ റിപ്പോർട്ട് .

രോഗബാധിതരുമായി സമ്പർക്കത്തിലേർപ്പെട്ടവർക്കുള്ള ദീർഘമായ ക്വാറന്റൈനും,ഒറ്റപ്പെട്ടുപോയ അന്യ സംസ്ഥാനത്തൊഴിലാളികൾക്കു നൽകിയ കരുതലും കേരളത്തിന്റെ മികവാണ്.ഇന്ത്യയ്ക്കു തന്നെ മാതൃകയാകുന്നതാണ് പ്രവർത്തനങ്ങൾ.ഇതെല്ലാം കണക്കിലെടുക്കുമ്പോൾ കേരളത്തെ പ്രശംസിക്കാതിരിക്കാൻ കഴിയില്ലെന്ന് കഴിഞ്ഞദിവസം പ്രസിദ്ധീകരിച്ച വിശദമായ റിപ്പോർട്ടിൽ വാഷിംഗ്ടൺ പോസ്റ്റ് വ്യക്തമാക്കുന്നു.

ഇന്ത്യയിലെ ഇതര സംസ്ഥാനങ്ങൾ നടത്തിയ ടെസ്റ്റുമായി താരതമ്യപ്പെടുത്തുമ്പോൾ ഇന്ത്യ നടത്തിയ മൊത്തം രോഗപരിശോധനയുടെ 10 ശതമാനം കേരളത്തിലാണ്.ഏപ്രിൽ ആദ്യ ആഴ്ചയിൽ മാത്രം 13000 പരിശോധനയാണ് കേരളം നടത്തിയത്.

ഇന്ത്യ​യുടെ 1.13 ശത​മാനമെ ഭൂവി​സ്തൃ​തി​യുള്ളുവെങ്കിലും ജനങ്ങൾ തിങ്ങിപ്പാർക്കുന്ന സംസ്ഥാനമായ കേരളം കൊവിഡ് പ്രതിരോധത്തിൽ ശക്തമായ ചുവടുവയ്പ്പാണ് നടത്തിവരുന്നത്. കോവിഡ് രോഗം ഇന്ത്യ​യിൽ ആദ്യം റിപ്പോർട്ട് ചെയ്തത് ജനു​വരി 30 ന് കേര​ള​ത്തി​ലാ​യി​രു​ന്നു. തുടർന്നി​ങ്ങോട്ട് സ്വീക​രിച്ച രോഗപ്രതിരോധ പ്ര​വർത്തനങ്ങൾ സംസ്ഥാ​ന​ത്തിന് പ്രയോജനകരമായി.

ഫല​പ്ര​ദ​മായി രോഗ പ്രതി​രോധ സൂചി​ക​ക​ളിൽ ബേസിക് റീപ്രൊ​ഡ​ക്ഷൻ നമ്പർ (ബി.ആ​ർ​.എൻ ) മരണ നിര​ക്ക്, ചികി​ത്സ, , വിജ്ഞാന വ്യാപ​നം,എന്നിവ ഇതിൽ ഉൾപ്പെ​ടു​ന്നു. സാമൂഹ്യ അകലം പാലി​ക്കു​ന്ന​തിലും, അനാ​വശ്യ യാത്ര​കൾ ഒഴി​വാ​ക്കു​ന്ന​തിലും മല​യാ​ളിയെ നിർബന്ധിത​രാ​ക്കി​യ​താണ് ഇതി​നു​പി​ന്നിലെ വിജ​യ​ര​ഹസ്യം.ലോകാരോഗ്യ സംഘടനയുടെ ഇന്ത്യൻ പ്രതിനിധി ഹെങ്ക് ബെക്കാദം കഴിഞ്ഞകാലങ്ങളിൽ ആരോഗ്യ മേഖലയിൽ കേരളം കൈവരിച്ച നേട്ടങ്ങളെ പ്രശംസിച്ചത് റിപ്പോർട്ടിൽ ഉദ്ധരിച്ചിട്ടുണ്ട്.കേരളത്തിൽ കമ്മ്യൂണിസ്റ്റ് സർക്കാർ ദീർഘകാലം ഭരിച്ചതിലൂടെ ഉണ്ടായ നേട്ടങ്ങളെക്കുറിച്ചും റിപ്പോർട്ടിൽ പറയുന്നു.

ആരോ​ഗ്യ കേന്ദ്ര​ങ്ങ​ളിലെ ഭൗതിക സൗക​ര്യ​ങ്ങളും ആശാ​വർക്കർ മുതൽ ഡോക്ടർമാർ വരെ​യുള്ള ആരോ​ഗ്യ​പ്ര​വർത്ത​ക​രുടെ ചിട്ട​യോ​ടെ​യുള്ള നെറ്റ് വർക്കിംഗ്, രോഗ ലക്ഷണ​മു​ള്ള​വരെ ടെസ്റ്റിം​ഗിന് വിധേ​യ​രാ​ക്കൽ, മാധ്യ​മ​ങ്ങ​ളി​ലൂ​ടെ​യുള്ള ശാസ്ത്രീയ അവ​ബോധം എന്നിവ സമ്പൂർണ്ണ സാക്ഷ​രത കൈവ​രിച്ച് കേര​ള​ത്തിലെ സുസ്ഥിര രോഗ നിർണ്ണ​യ​ത്തിന് ഉപ​ക​രി​ച്ചി​വരുന്നു. കോവിഡ്-19 നെ നേരി​ടു​ന്ന​തിൽ ഇന്ത്യ മറ്റു രാജ്യ​ങ്ങൾക്കു മുന്നി​ലാ​ണെന്ന് കേംബ്രിഡ്ജ് ഇൻഡെക്സ് ഫോർ കോവിഡ്-19 ഗവേണൻസ് റെസ്‌പോൺസ് പഠനം വ്യക്ത​മാ​ക്കി​യി​ട്ടുണ്ട്. പഠ​ന​ത്തിൽ കേര​ള​ത്തെ​ക്കു​റിച്ച് പരാ​മർശി​ച്ചി​ട്ടു​ണ്ട്. അമേ​രി​ക്ക, ജർമ്മ​നി, ഇറ്റ​ലി, സ്‌പെയിൻ ദക്ഷിണ കൊറിയ ബ്രിട്ടൻ തുട​ങ്ങിയ രാജ്യ​ങ്ങളെ താര​തമ്യം ചെയ്താണ് പഠ​നം.

ദേ​ശീയ തല​ത്തിലും കോവിഡ് ബാധി​ച്ച​വ​രുടെ മരണ നിരക്ക് കേര​ള​ത്തിൽ ഒരു ശത​മാ​ന​ത്തിൽ താഴെ മാത്ര​മാ​ണ്. രോഗം ബാധിച്ച വ്യക്തി​ക​ളിൽ നിന്നും രോഗ​ബാ​ധി​ത​രാ​കുന്ന ബി.ആർ. എൻ സൂചി​കയും 0.5-ൽ താഴെ​യാ​ണ്.