ലണ്ടൻ: ബ്രിട്ടന് 30 ലക്ഷം പാരാസെറ്റമോൾ പാക്കറ്റുകളുടെ സഹായവുമായി ഇന്ത്യ. മരുന്നിന്റെ ആദ്യ ബാച്ച് നാളെ ലണ്ടനിലെത്തും. ലോകം മുഴുവനും പ്രതിസന്ധി നേരിടുന്ന ഘട്ടത്തിലും ഇരുരാജ്യങ്ങളും സഹകരിച്ച് മുന്നോട്ടുപോകുന്നതിന്റെ പ്രതീകമാണ് ഈ കയറ്റുമതി.

കൊവിഡ് ഭീഷണിക്കെതിരായി ഇന്ത്യയും ബ്രിട്ടനും ഒരുമിച്ച് പോരാടും. കയറ്റുമതിക്ക് അനുവാദം നല്‍കിയതിന് യു.കെ സര്‍ക്കാരിന് വേണ്ടി ഇന്ത്യയോട് നന്ദി അറിയിക്കുന്നു - കോമണ്‍വെല്‍ത്ത്, ദക്ഷിണേഷ്യ സഹമന്ത്രി താരിഖ് അഹമ്മദ് പറഞ്ഞു.

ഇന്ത്യയിൽ കുടുങ്ങിയ, ബ്രിട്ടനിലേക്ക് മടങ്ങാൻ ആഗ്രഹിക്കുന്ന ബ്രിട്ടീഷ് പൗരന്മാർക്കാവശ്യമായ സഹായങ്ങൾ ലഭ്യമാക്കുന്നതിന് വേണ്ടി ലണ്ടനിലുള്ള ഇന്ത്യൻ ഹൈക്കമ്മിഷനിലെ ഉദ്യോഗസ്ഥരുമായും, വിദേശകാര്യ മന്ത്രാലയവുമായും തങ്ങൾ നിരന്തരം ബന്ധപ്പെട്ടുകൊണ്ടിരിക്കുന്നുണ്ടെന്നും അഹമ്മദ് പറഞ്ഞു. ഇന്ത്യയിൽ കുടുങ്ങിയ ബ്രിട്ടീഷ് പൗരന്മാരെ തിരികെ നാട്ടിലെത്തിക്കുന്നതിന് യു.കെ സര്‍ക്കാര്‍ വിമാന സർവീസ് ഏർപ്പെടുത്തിയിട്ടുണ്ട്. പരിശോധനയ്ക്ക് ശേഷമെ ഇവരെ വിമാനത്തിൽ പ്രവേശിപ്പിക്കൂ. ബ്രിട്ടനിൽ എത്തിയതിന് ശേഷവും പരിശോധന നടത്തും.