ന്യൂഡൽഹി: അക്കൗണ്ട് ഉടമകൾക്ക് എടിഎം ഇടപാടുകൾ സൗജന്യമാക്കി എസ്.ബി.ഐ. എസ്.ബി.ഐ അക്കൗണ്ട് ഉടമകൾക്ക് ഏത് ബാങ്കിന്റെ എ.ടി.എമ്മിൽ നിന്നും ചാർജ് നൽകാതെ എത്ര വേണമെങ്കിലും പണം പിൻവലിക്കാം. ജൂൺ 30 വരെയാണ് ഈ സൗകര്യം. ബാങ്കിന്റെ വെബ്‌സൈറ്റിലൂടെയാണ് എസ്.ബി.ഐ ഇക്കാര്യം അറിയിച്ചത്.

എടിഎം നിരക്കുകൾ നിശ്ചിത കാലത്തേക്ക് ഒഴിവാക്കണമെന്ന് ധനമന്ത്രി നിർമ്മലാ സീതാരാമൻ നേരത്തെ ബാങ്കുകൾക്ക് നിർദ്ദേശം നൽകിയിരുന്നു. തുടർന്നാണ് എടിഎം നിരക്കുകൾ പിൻവലിക്കാൻ ബാങ്ക് തീരുമാനിച്ചത്.

സാധാരണ സേവിംഗ്‌സ് ബാങ്ക് അക്കൗണ്ട് ഉടമകൾക്ക് സൗജന്യമായി എട്ട് എടിഎം ഇടപാടുകളാണ് ഇതുവരെ അനുവദിച്ചിരുന്നത്. മെട്രോ നഗരങ്ങളിലല്ലെങ്കിൽ പ്രത്യേക നിരക്ക് നൽകാതെ 10 സൗജന്യ ഇടപാട് നടത്താം. അതിന് മുകളിലുള്ള ഓരോ സാമ്പത്തിക ഇടപാടിനും 20 രൂപയും ജിഎസ്ടിയും സാമ്പത്തിക ഇടപാടിന് എട്ട് രൂപയും ജിഎസ്ടിയുമാണ് ഈടാക്കിയിരുന്നത്.