ഹൈദരാബാദ്: സർക്കാർ വാ​ഗ്ദാനം ചെയ്ത 1500 രൂപ ധനസഹായം വാങ്ങാൻ ക്യൂവിൽ കാത്തിരുന്ന സ്ത്രീ കുഴഞ്ഞുവീണു മരിച്ചു. തെലങ്കാനയിലാണ് സംഭവം. 47 കാരിയാണ് മരിച്ചത്.പണം വാങ്ങാൻ എത്തിയ ഇവർ ബാങ്കിന് സമീപത്തുള്ള മരച്ചുവട്ടിൽ ഇരിക്കവെ കുഴഞ്ഞുവീഴുകയായിരുന്നു. ഹൃദയാഘാതമാണ് മരണകാരണമെന്ന് കരുതപ്പെടുന്നു. പൊലീസ് അന്വേഷണം ആരംഭിച്ചു. കൊവിഡാണോ മരണകാരണമെന്നറിയാനുള്ള പരിശോധനയും നടത്തും.
ലോക്ക് ഡൗൺ പ്രഖ്യാപിച്ചിരിക്കുന്നതിന്റെ പശ്ചാത്തലത്തിൽ ഭക്ഷ്യസുരക്ഷാ കാർഡ് കൈവശമുള്ള ഓരോ കുടുംബത്തിനും പച്ചക്കറികളും പലവ്യജ്ഞനങ്ങളും വാങ്ങുന്നതിന് വേണ്ടി 1500 രൂപ സർക്കാർ ധനസഹായമായി പ്രഖ്യാപിച്ചിരുന്നു. ഭക്ഷ്യ സുരക്ഷാ കാർഡ് ഉള്ള എല്ലാവർക്കും 12 കിലോ അരി നൽകുമെന്നും സർക്കാർ പ്രഖ്യാപിച്ചിട്ടുണ്ട്.