ന്യൂഡൽഹി: രാജ്യത്ത് പ്രഖ്യാപിച്ച ലോക്ക് ഡൗൺ മേയ് മൂന്നിന് അവസാനിച്ചാലും ട്രെയിൻ, വിമാന സർവീസുകൾ ഉടൻ പുനരാരംഭിക്കില്ലെന്ന്​ സൂചന. കഴിഞ്ഞ ദിവസം കേന്ദ്ര പ്രതിരോധ മന്ത്രി രാജ്​നാഥ്​ സിംഗിന്റെ നേതൃത്വത്തിൽ ചേർന്ന മന്ത്രിമാരുടെ യോഗത്തിലാണ്​ ഇതുസംബന്ധിച്ച ചർച്ചയുണ്ടായത്​. ടെക്​സ്​റ്റൈൽ മന്ത്രി സ്​മൃതി ഇറാനിയും വ്യോമയാന മന്ത്രി ഹർദീപ്​ പുരിയും യോഗത്തിൽ പ​ങ്കെടുത്തിരുന്നു.

യോഗത്തിനു ശേഷം ഇവർ പ്രധാനമന്ത്രിയുമായി ചേര്‍ന്ന് നടത്തുന്ന കൂടിക്കാഴ്ചയിലേ അന്തിമ തീരുമാനമുണ്ടാകൂ. മേയ്​ 15 മുതൽ വ്യോമ ഗതാഗതം ആരംഭിക്കാനാണ്​ നിലവിൽ കേന്ദ്ര സർക്കാർ ആലോചിക്കുന്നത്​. വ്യോമ ഗതാഗതം പുനരാരംഭിക്കുന്നത്​ സംബന്ധിച്ച്​ ചർച്ചയുണ്ടായെന്നും അന്തിമ തീരുമാനമായിട്ടില്ലെന്നും ഹർദീപ്​ പുരി പറഞ്ഞു.

നേരത്തെ, മെയ്​ നാല്​ മുതൽ ആഭ്യന്തര വിമാന സർവീസുകളുടേയും ജൂൺ ഒന്ന്​ മുതൽ അന്താരാഷ്​ട്ര സർവീസുകളുടേയും ബുക്കിംഗ്​ എയർ ഇന്ത്യ ആരംഭിച്ചിരുന്നു. ഇതിന്​ പിന്നാലെ സർക്കാരിന്റെ ഉത്തരവിന്​ ശേഷം മാത്രം ബുക്കിംഗ്​ തുടങ്ങിയാൽ മതിയെന്ന നിർദേശം വിമാന കമ്പനികൾക്ക്​ വ്യോമയാന മന്ത്രാലയം നൽകുകയും ചെയ്​തിരുന്നു.