ന്യൂഡൽഹി : മാസ്​ക്​ ധരിക്കാതെ പെട്രോളടിക്കുവാൻ എത്തുന്നവർക്ക് ഇന്ധനം നൽകില്ലെന്ന്​ പെട്രോളിയം ഡീലർമാരുടെ സംഘടനയുടെ മുന്നറിയിപ്പ്. കൊവിഡ് പടരുന്ന സാഹചര്യത്തിൽ ജീവനക്കാരുടെ സുരക്ഷ പരി​ഗണിച്ചാണ് തീരുമാനമെന്ന് ആൾ ഇന്ത്യ പെട്രോളിയം ഡീലേഴ്സ്​ അസോസിയേഷൻ പ്രസിഡന്റ് അജയ്​ ബൻസാൽ പറഞ്ഞു.

കൊവിഡ് വൈറസ് ബാധ കണക്കിലെടുത്ത് ജീവനക്കാരുടെ സുരക്ഷ ഉറപ്പുവരുത്താൻ, ഇന്ത്യയിലുടനീളമുള്ള പമ്പുകളിൽ മാസ്ക് ധരിക്കാത്തവർക്ക് ഇന്ധനം വിൽക്കേണ്ടെന്ന് തീരുമാനിച്ചതായി അസോസിയേഷൻ അറിയിച്ചു. 365 ദിവസവും 24 മണിക്കൂറും പ്രവർത്തിക്കുകയാണ്​ പമ്പുകൾ. ലോക്ക്ഡൗൺ കാലത്ത് ജീവനക്കാർ ഉപഭോക്​താക്കളുമായി നിരന്തരം ബന്ധപ്പെടുകയാണ്​. ജീവനക്കാരുടെ സുരക്ഷ പരിഗണിച്ച്​ കർശനമായ തീരുമാനങ്ങൾ എടുക്കാൻ ഞങ്ങൾ നിർബന്ധിതരാണെന്നും അജയ്​ ബൻസാൽ പറഞ്ഞു.