തിരുവനന്തപുരം: ഇന്ന് കൂടുതൽ രോഗികൾക്ക് കൊവിഡ് 19 രോഗബാധ സ്ഥിരീകരിച്ച സാഹചര്യത്തിൽ സംസ്ഥാനത്ത് റംസാൻ വ്രതനാളുകളിലും നിയന്ത്രണം തുടരുമെന്ന് മുഖ്യമന്ത്രി പിണറായി വിജയൻ. സംസ്ഥാനത്ത് ഇഫ്താറുകളും കൂട്ടപ്രാർത്ഥനയും ഒഴിവാക്കണമെന്നും ആരാധനാലയങ്ങൾ അടഞ്ഞുതന്നെ കിടക്കണമെന്നും അദ്ദേഹം വ്യക്തമാക്കി.

കൊവിഡ് നിയന്ത്രണങ്ങൾ തുടരാമെന്ന് ഇസ്ളാം മതപണ്ഡിതർ ഉറപ്പ് നൽകിയതായും മുഖ്യമന്ത്രി പറഞ്ഞു. കൊവിഡ് അവലോകന യോഗത്തിന് ശേഷം ഇന്ന് നടന്ന വാർത്താസമ്മേളനത്തിലാണ് അദ്ദേഹം ഇക്കാര്യം അറിയിച്ചത്. രോഗികൾ കൂടിയ സാഹചര്യത്തിൽ ലോക്ക്ഡൗൺ കൃത്യമായി നടപ്പാക്കപ്പെടുന്നു എന്ന് ഉറപ്പാക്കാനുള്ള നടപടികൾ സ്വീകരിച്ചിട്ടുണ്ടെന്നും അദ്ദേഹം പറഞ്ഞു.

അതേസമയം, കേരളത്തിൽ ഇന്ന് 19 പേർക്ക് കൊവിഡ് 19 സ്ഥിരീകരിച്ചു. കൊവിഡ് അവലോകനത്തിന് ശേഷം നടത്തിയ വാർത്താ സമ്മേളനത്തിൽ മുഖ്യമന്ത്രി പിണറായി വിജയനാണ് ഇക്കാര്യം വ്യക്തമാക്കിയത്.കണ്ണൂരിൽ 10 പേർക്ക് കൂടി രോഗം സ്ഥിരീകരിച്ചു. ഇതിൽ ഒമ്പത് പേർ വിദേശത്തു നിന്നും എത്തിയവരാണ്.

കാസർകോട് മൂന്ന്,​ പാലക്കാട് നാല്,​ മലപ്പുറം- ഒന്ന്,​ കൊല്ലം- ഒന്ന് എന്നിങ്ങനെയാണ് മറ്റുകണക്കുകൾ. ഏറ്റവും കൂടുതൽ രോഗികൾ കണ്ണൂരിലാണ്. 16 പേർ ഇന്ന് സംസ്ഥാനത്ത് രോഗമുക്തി നേടിയാതായും മുഖ്യമന്ത്രി വ്യക്തമാക്കി.