റിയാദ്: നാട്ടിലേക്ക് മടങ്ങാൻ ആഗ്രഹിക്കുന്ന പ്രവാസികൾക്ക് പുതിയ സൗകര്യമൊരുക്കി സൗദി അറേബ്യ. 'ഔദ' എന്ന പേരിലാണ് സൗദി ആഭ്യന്തര മന്ത്രാലയം പ്രവാസികൾക്ക് സൗകര്യം ഒരുക്കിയിരിക്കുന്നത്. നിലവിൽ എക്‌സിറ്റ് റീ എൻട്രി, എക്‌സിറ്റ് വിസ കൈയിലുള്ളവർക്ക് ഇത് പ്രയോജനപ്പെടുത്താം.
സൗദി ജവാസത്തിന്റെ 'അബ്ഷിർ' വഴി ഓൺലൈനായാണ് ഇതിന് അപേക്ഷ നൽകേണ്ടത്.
'അബ്ഷിർ'പോർട്ടൽ സന്ദർശിച്ച് 'ഔദ' എന്ന ഐക്കൺ സെലക്ട് ചെയ്യണം.ശേഷം കാണുന്നകോളത്തിൽ ഇഖാമ നമ്പർ, ജനന തീയതി, മൊബൈൽ നമ്പർ, പുറപ്പെടുന്ന നഗരം, എത്തിച്ചേരേണ്ട വിമാനത്താവളം എന്നീ വിവരങ്ങൾ പൂരിപ്പിക്കണം. അപേക്ഷ സ്വീകരിച്ചാൽ യാത്രയുടെ തീയതി, ടിക്കറ്റ് നമ്പർ, ബുക്കിംഗ് വിവരങ്ങൾ എന്നിവ വ്യക്തമാക്കി കൊണ്ടുള്ള സന്ദേശം അപേക്ഷകന്റെ മൊബൈലിൽ ലഭിക്കും. ഇതനുസരിച്ച് അപേക്ഷകന് യാത്രയ്ക്കുള്ള തയ്യാറെടുപ്പുകൾ നടത്താം.
റിയാദ് കിംഗ് ഖാലിദ്, ജിദ്ദ കിംഗ് അബ്ദുൾ അസീസ്, മദീന അമീർ മുഹമ്മദ് ബിൻ അബ്ദുൾ അസീസ്, ദമ്മാം കിംഗ് ഫഹദ് എന്നീ അന്താരാഷ്ട്ര വിമാനത്താവളങ്ങൾ വഴിയായിരിക്കും യാത്ര. അബ്ഷിർപോർട്ടലിൽ അക്കൗണ്ട് ഇല്ലാത്തവർക്കും നിലവിൽ ഈ സൗകര്യം ഉപയോഗപ്പെടുത്താവുന്നതാണെന്ന് അധികാരികൾ അറിയിച്ചിട്ടുണ്ട്.