ചെന്നൈ: തമിഴ്നാട്ടിൽ ചെന്നൈ, മധുര, കോയമ്പത്തൂർ, തിരുപ്പൂർ, സേലം എന്നീ അഞ്ച് നഗരങ്ങളിൽ നാളെ മുതൽ സമ്പൂർണ ലോക്ക് ഡൗൺ പ്രഖ്യാപിച്ചു. സംസ്ഥാനത്ത് കൊവിഡ്​ ബാധിതരുടെ എണ്ണം വർദ്ധിക്കുന്ന സാഹചര്യത്തിലാണ് നടപടി. ഭക്ഷ്യസാധനങ്ങൾ ഹോം ഡെലിവറിയായി ലഭിക്കും. ഗതാഗതവും പൂർണമായി വിലക്കി. ലോക്ക് ​ഡൗൺ മാനദണ്ഡങ്ങൾ പാലിക്കാത്തവർക്കെതിരെ നിയമ നടപടിയെടുക്കുമെന്ന് മുഖ്യമന്ത്രി പളനിസ്വാമി അറിയിച്ചു.

ചെന്നൈ, മധുര, കോയമ്പത്തൂർ നഗരങ്ങൾ നാളെ വൈകിട്ട്​ ആറു മുതൽ 29 വരെ അടച്ചിടും. തിരുപ്പൂരിലും സേലത്തും നാളെ മുതൽ 28 വരെയും അടച്ചിടും. ചെന്നൈയിൽ 400 ലേറെ പേർക്ക്​ കൊവിഡ്​ സ്ഥിരീകരിച്ചിട്ടുണ്ട്​. കോയമ്പത്തൂരിൽ 134 ഉം തിരുപ്പൂരിൽ 110ഉം രോഗികളുണ്ട്. ആശുപത്രികൾ, മെഡിക്കൽ സ്​റ്റോറുകൾ, അമ്മ കാന്റീനുകളും എന്നിവ തുറന്നു പ്രവർത്തിക്കും. റേഷൻ കടകൾ, സാമൂഹിക അടുക്കളകൾ, ഭിന്ന​ശേഷിക്കാർക്കും മുതിർന്നവർക്കും സേവനം നൽകുന്ന സംഘടനകൾ എന്നിവർക്കും പ്രവർത്തിക്കാം. ഭക്ഷ്യവസ്​തുക്കൾ വിൽക്കുന്ന കടകൾ ഉച്ചവരെ തുറക്കാം.