തിരുവനന്തപുരം: ലോക്ക് ഡൗൺ തീർന്നാൽ രണ്ടാഴ്ചയ്ക്കുള്ളിൽ എല്ലാ സർവ്വകലാശാല പരീക്ഷകളും നടത്താൻ ശ്രമിക്കുമെന്ന് മന്ത്രി കെ.ടി ജലീൽ. അതിനുള്ള നിർദ്ദേശം നൽകി കഴിഞ്ഞെന്നും അദ്ദേഹം അറിയിച്ചു. എല്ലാ സർവകലാശാലകളും ഓൺലൈനായി ക്ലാസുകൾ പൂർത്തീകരിക്കണം. എത്രയും വേഗം അദ്ധ്യായന വർഷം തുടങ്ങാനാണ് ശ്രമിക്കുകയെന്നും മന്ത്രി പറഞ്ഞു. ഇതിനായി അവസാന വർഷ പരീക്ഷകൾ ആദ്യം തീർക്കും.

അദ്ധ്യായന വർഷം തുടങ്ങാൻ എല്ലാ പരീക്ഷകളും തീരുന്നത് വരെ കാത്തിരിക്കില്ലെന്നും മന്ത്രി വ്യക്തമാക്കി. പ്രവാസികളെ തിരിച്ചെത്തിക്കാനുള്ള കേന്ദ്രസർക്കാർ നീക്കം സ്വാഗതാർഹമാണെന്ന് പറഞ്ഞ മന്ത്രി, പ്രവാസികൾ തിരിച്ചെത്തുന്നതിന് മുന്നോടിയായി കേരളം എല്ലാ സജ്ജീകരണങ്ങളും പൂർത്തിയാക്കിയെന്നും വ്യക്തമാക്കി. കൊവിഡ് ഇതര മരണങ്ങളിൽ, മൃതദേഹം നാട്ടിലേക്ക് തിരികെ കൊണ്ടുവരാനുള്ള സൗകര്യം കേന്ദ്രസർക്കാർ ഒരുക്കണം. ഇതിന് കേന്ദ്ര ആഭ്യന്തര മന്ത്രാലയത്തിന്റെ എൻ.ഒ.സി വാങ്ങണമെന്ന നിർദ്ദേശം ഒഴിവാക്കണമെന്നും മന്ത്രി ആവശ്യപ്പെട്ടു.