കൊച്ചി: വായ്പകൾക്ക് റിസർവ് ബാങ്ക് അനുവദിച്ച മൊറട്ടോറിയം കാലാവധി, അധികപലിശയോ പിഴ പലിശയോ ഈടാക്കാതെ ഒരു വർഷത്തേക്ക് നീട്ടി നല്കണമെന്ന് ഹൈബി ഈഡൻ എംപി ആവശ്യപ്പെട്ടു. ഇക്കാര്യം ചൂണ്ടിക്കാട്ടി പ്രധാനമന്ത്രി, കേന്ദ്ര ധനകാര്യ മന്ത്രി, റിസർവ്വ് ബാങ്ക് ഗവർണർ എന്നിവർക്ക് കത്ത് നല്കി.

കൊവിഡ് 19 ന്റെ സാഹചര്യത്തിൽ ലോകം മുഴുവൻ വലിയ സാമ്പത്തീക പ്രതിസന്ധി നേരിടുകയാണ്. സമാന സാഹചര്യം നമ്മുടെ രാജ്യത്തൂമുണ്ട്. ഉപജീവനത്തിനും ഭവന നിർമാണത്തിനും മക്കളുടെ വിവാഹവശ്യങ്ങൾക്കെല്ലാമായി ലോൺ എടുത്തിരിക്കുന്നവരാണ് വലിയ പ്രതിസന്ധിയിലാകുന്നത്.മധ്യ വർഗത്തെയാണ് ഇത് ഏറ്റവും കൂടുതൽ ബാധിക്കുന്നത്. ഇവരുടെ ജീവനമാർഗമായ ചെറുകിട വ്യാപാര വ്യവസായങ്ങളും തൊഴിലും വലിയ ചോദ്യ ചിഹ്നമായി നിൽക്കുകയാണ്.ഈ ആഘാതത്തിൽ നിന്ന് അവർ തിരിച്ചെത്തണമെങ്കിൽ കൂടുതൽ സമയം വേണ്ടി വരുമെന്ന് ഹൈബി ഈഡൻ പറഞ്ഞു.

നിലവിൽ പ്രഖ്യാപിച്ച 3 മാസത്തെ മൊറട്ടോറിയത്തിൽ ഉപഭോക്താവിന്റെ മേൽ ചുമത്തുന്ന അധിക പലിശയോ പിഴ പലിശയോ ഒഴിവാക്കണമെന്ന് ആവശ്യപ്പെട്ട് മുൻപ് കേന്ദ്ര മന്ത്രിക്ക് എംപി കത്ത് നല്കിയിരുന്നു.