വാഷിംഗ്​ടൺ: യു.എസ്​ പ്രസിഡന്റിന്റെ ഔദ്യോഗിക വസതിയായ വൈറ്റ്​ഹൗസ്​ പ്രധാനമന്ത്രി നരേന്ദ്രമോദിയെ ട്വിറ്ററിൽ അൺഫോളോ ചെയ്​തു. മോദിയെ വൈറ്റ്​ഹൗസ്​ ട്വിറ്ററിൽ ഫോളോ ചെയ്​തത്​ നേരത്തെ വലിയ വാർത്തയായിരുന്നു. എന്നാൽ ഫോളോ ചെയ്​ത്​ മൂന്ന്​ ആഴ്​ചകൾക്കകമാണ്​​ മോദിയെ വൈറ്റ്​ഹൗസ്​ അൺഫോളോ ചെയ്​തത്​. പ്രധാനമന്ത്രിയുടെ ഔദ്യോഗിക ട്വിറ്റർ അക്കൗണ്ട്​ കൂടാതെ സ്വകാര്യ അക്കൗണ്ടും വൈറ്റ്​ഹൗസ്​ ഫോളോ ചെയ്​തിരുന്നു. മോദിക്കു പിന്നാലെ ഇന്ത്യയിലെ യു.എസ്​ എംബസി, യു.എസിലെ ഇന്ത്യൻ എംബസി, രാഷ്​ട്രപതിയുടെ ഔദ്യോഗിക പേജ്​ എന്നിവയും വൈറ്റ്​ഹൗസ്​ ഫോളോ ചെയ്​തിരുന്നു. അതെല്ലാം ഇപ്പോൾ അൺഫോളോ ചെയ്​തിരിക്കയാണ്​. കൊവിഡ്​ ചികിത്സയ്ക്ക്​ മരുന്നു നൽകണമെന്ന യു.എസി​​ന്റെ ആവശ്യം ഇന്ത്യ അംഗീകരിച്ചതിനു പിന്നാലെയാണ്​ വൈറ്റ്​ഹൗസ്​ മോദിയുടെ അക്കൗണ്ട്​ ഫോളോ ചെയ്യാൻ തുടങ്ങിയത്​. അപൂർവമായേ വൈറ്റ്​ഹൗസ്​ മറ്റ്​ രാജ്യങ്ങളിലെ നേതാക്കളെ ഫോളോ ചെയ്യാറുള്ളൂ. ഇപ്പോൾ വൈറ്റ്​ഹൗസ്​ ഫോളോ ചെയ്യുന്നവരുടെ എണ്ണം 19ൽനിന്ന്​ 13 ആയി കുറഞ്ഞു. 21 ദശലക്ഷം ഫോളോവേഴ്​സാണ്​ വൈറ്റ്​ഹൗസ്​ ട്വിറ്റർ അക്കൗണ്ടിനുള്ളത്​.