ന്യൂഡൽഹി: കൊവിഡും ലോക്ക്ഡൗണും ആഘാതമായതോടെ, മാർ‌ച്ചിൽ ഇന്ത്യയുടെ മുഖ്യ വ്യവസായ മേഖലയുടെ വളർച്ച നെഗറ്രീവ് 6.5 ശതമാനത്തിലേക്ക് കൂപ്പകുത്തി. വ്യാവസായിക ഉത്‌പാദന സൂചികയിൽ (ഐ.ഐ.പി) 40.27 ശതമാനം പങ്കുവഹിക്കുന്ന മുഖ്യ വ്യവസായ മേഖല 2019 മാ‌ർച്ചിൽ 5.8 ശതമാനവും ഇക്കഴി‌ഞ്ഞ ഫെബ്രുവരിയിൽ 7.1 ശതമാനവും വളർന്നിരുന്നു.

കൽക്കരി, ക്രൂഡോയിൽ, പ്രകൃതിവാതകം, സിമന്റ്, സ്‌റ്രീൽ, വൈദ്യുതി, റിഫൈനറി ഉത്‌പന്നങ്ങൾ, വളം എന്നീ എട്ട് വിഭാഗങ്ങളാണ് മുഖ്യ വ്യവസായ മേഖലയിലുള്ളത്. കൽക്കരി ഉത്‌പാദനം നാലു ശതമാനം വളർന്നു. മറ്ര് വിഭാഗങ്ങളെല്ലാം കുറിച്ചത് നെഗറ്രീവ് വളർച്ച. ക്രൂഡോയിൽ (-5.5 ശതമാനം), പ്രകൃതിവാതകം (-15.2 ശതമാനം), റിഫൈനറി ഉത്‌പന്നങ്ങൾ (-0.5 ശതമാനം), വളം (-11.9 ശതമാനം), സ്‌റ്രീൽ (-13 ശതമാനം), സിമന്റ് (-24.7 ശതമാനം), വൈദ്യുതി (-7.2 ശതമാനം) എന്നിങ്ങനെയാണ് തളർന്നത്.