പത്തനംതിട്ട : കൊവിഡ് 19 പ്രതിരോധ നടപടികളുടെ ഭാഗമായി പട്ടികജാതി വികസന വകുപ്പിന്റെ നേതൃത്വത്തിൽ വിവിധ കോളനികളിൽ കുടിവെള്ള വിതരണം, ഭക്ഷണം, അത്യാവശ്യ മരുന്നുകൾ, രോഗികളെ ആശുപത്രിയിൽ എത്തിക്കൽ എന്നിവ നടത്തി.ജില്ലയിലെ 31,609 പട്ടികജാതി കുടുംബങ്ങളിൽ 25,611 ലും വകുപ്പിലെ പ്രമോട്ടർമാർ എത്തി വിവര ശേഖരണവും ആവശ്യമായവർക്കു വേണ്ട സഹായങ്ങളും നൽകി.കോവിഡ് ബോധവത്ക്കരണ ലഘുലേഖകൾ ആകെയുള്ള 1695ൽ1524 സങ്കേതങ്ങളിലും വിതരണം ചെയ്തു.ആകെയുള്ള 1,43,564 പട്ടികജാതി ജനസംഖ്യയിൽ 244 പേരാണ് ജില്ലയിൽ നിരീക്ഷണത്തിൽ കഴിയുന്നത്.ഇതുവരെ ആരും രോഗബാധിതരായിട്ടില്ല.ഭക്ഷണം ആവശ്യമായവർക്ക് സാമൂഹ്യ അടുക്കളയുമായി ബന്ധപ്പെട്ട് ഭക്ഷണമെത്തിക്കാനും നടപടി സ്വീകരിച്ചു.മല്ലപ്പള്ളിയിൽ പ്രവർത്തിക്കുന്ന പട്ടികജാതി വികസന വകുപ്പിന്റെ പ്രീമെട്രിക് ഹോസ്റ്റൽ ദുരിതാശ്വാസ പ്രവർത്തനങ്ങൾക്ക് വിട്ടുകൊടുത്തു.ജില്ലയിലെ മറ്റ് അഞ്ച് പ്രീമെട്രിക് ഹോസ്റ്റലുകളും ആവശ്യമെങ്കിൽ ദുരിതാശ്വാസ പ്രവർത്തനങ്ങൾക്കായി സജ്ജമാക്കിയിട്ടുണ്ടെന്ന് ജില്ലാ പട്ടികജാതി വികസന ഓഫീസർ എസ്.എസ്.ബീന അറിയിച്ചു.ജില്ലാ പട്ടികജാതി വികസന വകുപ്പ് ഓഫീസിൽ അടിയന്തര നടപടികൾക്കായി സഹായസെൽ പ്രവർത്തിച്ചു വരുന്നു.